අයුතු ලෙස වත්කම් රැස් කිරිමේ චෝදනාව යටතේ සෞඛ්‍ය අමාත්‍යාංශයේ හිටපු ලේකම් ජනක ශ්‍රී චන්ද්‍රගුප්ත මහතා ලබන මස 08 වැනිදා දක්වා රක්ෂිත බන්ධනාගාරගත කරන ලෙස කොළඹ ප්‍රධාන මහේස්ත්‍රාත් තනුජා ලක්මාලි ජයතුංග මහත්මිය නියෝග කළා.
සැකකරු සතුව ඇති වත්කම්වල සැබෑ තොරතුරු මේ වන විට (26) අනාවරණය කර නොමැති බැවින් ඔහු සම්බන්ධයෙන් අල්ලස් පනතේ 23(අ) වගන්තිය සමග කියවිය යුතු දුෂණ විරෝධී පනතේ 09 වගන්තිය ප්‍රකාරව වැඩිදුරටත් විමර්ශන සිදු කරන බව පෙන්වා දෙමින් විමර්ශන නිලධාරීන් විසින් අධිකරණයට ඉදිරිපත් කළ කරුණු සලකා බැලු මහේස්ත්‍රාත්වරිය ඇප ඉල්ලීම ප්‍රතික්ෂේප කළා.
ඒ අනුව ලබන ජුලි 08 දක්වා රක්ෂිත බන්ධනාගාරගත කරන ලෙස නියෝග කළ අතර විමර්ශන නිලධාරීන්ට නියෝග කළේ විමර්ශන ප්‍රගතිය පිළිබඳ ව වැඩිදුර වාර්තා ඉදිරිපත් කරන ලෙසයි.
ප්‍රකාශයක් ලබාදීමට අද (26) උදෑසන අල්ලස් කොමිසමට පැමිණීමෙන් අනතුරුව ඒ මහතාව අත්අඩංගුවට ගත් අතර පස්වරුවේ ප්‍රධාන මහේස්ත්‍රාත් අධිකරණයට ඉදිරිපත් කෙරුණා.
ප්‍රමිතියෙන් තොර ප්‍රතිදේහ එන්නත් රජයේ රෝහල්වලට බෙදාහැරීම මගින් රුපියල් කෝටි ගණනක වංචා කිරීම සහ රෝගී ජීවීත අනාරක්ෂිත තත්වයකට පත් කිරීමේ සිද්ධියට සම්බන්ධව ද සෞඛ්‍ය අමාත්‍යාංශයේ හිටපු ලේකම් චන්ද්‍රගුප්ත සැකකරුවෙකු ලෙස නම් කර තිබෙනවා.
