මත්ද්‍රව්‍ය සඳහා ඇබ්බැහිවුවන්ට ස්වේච්ඡාවෙන් පුනරුත්ථාපනය වීමට හා කාන්තා පුනරුත්ථාපන මධ්‍යස්ථාන ස්ථාපිත කිරීමට පියවර ගන්නා බව අධිකරණ අමාත්‍ය හර්ෂණ නානායක්කාර මහතා පවසනවා.
පුනරුත්ථාපන කාර්යාංශ දිස්ත්‍රික් පුනරුත්ථාපන මධ්‍යස්ථාන සැලසුම පිළිබඳව සාකච්ඡාවක් අධිකරණ සහ ජාතික ඒකාබද්ධතා අමාත්‍ය, නීතිඥ, හර්ෂණ නානායක්කාර මහතාගේ ප්‍රධානත්වයෙන් ඊයේ පෙරවරුවේ (11) අධිකරණ අමාත්‍යාංශයේ දී පැවැත්වුණා.
පුනරුත්ථාපන කාර්යාංශ දිස්ත්‍රික් පුනරුත්ථාපන මධ්‍යස්ථාන සැලසුම පිළිබඳ ව හා ඒ සඳහා විසඳුමක් ලෙස මත්ද්‍රව්‍යවලට ඇබ්බැහි වූවන්ට ස්වේච්ඡාවෙන් පුනරුත්ථාපනය වීම සඳහා නේවාසික මධ්‍යස්ථාන 4ක් ස්ථාපිත කිරීම පිළිබඳ ව අවධානය යොමු වූ බවයි වාර්තා වන්නේ.
පුනරුත්ථාපනය වන පුද්ගලයින්ට පහසුවෙන් යොමු විය හැකි පරිදි එම නව මධ්‍යස්ථාන ස්ථාපිත කිරීමටත්, එහි පළමු මධ්‍යස්ථානය වැලිකන්ද සේනපුර වෘත්තිය පුහුණු හා සාක්ෂරතා මධ්‍යස්ථානය තුළ පිහිටුවීමටත්, සුදුසු ප්‍රදේශ තෝරා ගැනීමෙන් පසුව සෙසු මධ්‍යස්ථාන පිහිටුවීමටත් මෙහිදී තීරණය කෙරුණා.
විශේෂයෙන් මත්ද්‍රව්‍ය සඳහා ඇබ්බැහි වූ කාන්තාවන් පුනරුත්ථාපනය කිරීම සඳහා මධ්‍යස්ථානයක් ආරම්භ කිරීම පිළිබඳ ව ද මෙහිදී සාකච්ඡා පැවැත්වුණු බවයි අධිකරණ අමාත්‍යාංශය සඳහන් කළේ.
