විශ්වවිද්‍යාල ආචාර්යවරුන්ගේ සමිති සම්මේලනයේ නිලධාරීන් සහ අග්‍රාමාත්‍ය ආචාර්ය හරිනි අමරසූරිය අතර සාකච්ඡාවක් පවත්වා තිබෙනවා.
විශ්වවිද්‍යාල ආචාර්යවරුන්ගේ වැටුප් විෂමතා පිළිබඳ දැනුම්වත් කිරීම වෙනුවෙන් පැවති මෙම සාකච්ඡාව සඳහා මුදල් නියෝජ්‍ය අමාත්‍ය අනිල් ජයන්ත, අධ්‍යාපන නියෝජ්‍ය අමාත්‍ය මධුර සෙනෙවිරතන, ඇතුළු නිලධාරීන් පිරිසක් ද එක්ව සිටියා.
පාර්ලිමේන්තු පරිශ්‍රයේ දී පැවති මෙම සාකච්ඡාවේ දී එහිදී 2025 වසරේ සිදුකළ වැටුප් වැඩි කිරීමේදී රාජ්‍ය සේවකයන් සහ විශ්වවිද්‍යාල ආචාර්යවරුන්ගේ වැටුප් වැඩිවීම අතර වෙනසක් පවතින බවත්, විශ්වවිද්‍යාල අනධ්‍යන සේවකයන් සහ ආචාර්යවරුන් අතර ද වැටුප් වැඩි කිරීමේ දී විෂමතාවක් නිර්මාණය වී ඇති බවත් මෙහිදී විශ්වවිදයාල ආචාර්යවරුන්ගේ සමිති සම්මේලනය පෙන්වා දුන්නා.
ඒ, අනුව විශ්වවිද්‍යාල ආචාර්යවරුන්ගේ වැටුප් සම්බන්ධයෙන් පවතින තාක්ෂණික කාරණා පිළිබඳ අදාළ නිලධාරීන් සමඟ පළමුව සාකච්ඡා කිරීමටත්, එළඹෙන තීරණ අනුව ඉදිරි ක්‍රියාමාර්ග ගැනීමටත් එහිදී තීරණය වුණා.
විශ්වවිද්‍යාල ආචාර්යවරුන්ගේ සමිති සම්මේලනයේ සභාපති අනුරුද්ධ කරුණාරත්න, ලේකම් චාරුදත්ත ඉලන්ගසිංහ ඇතුළු අධ්‍යාපන අමාත්‍යාංශය, විශ්වවිද්‍යාල ප්‍රතිපාදන කොමිෂන් සභාව, කළමනාකරණ සේවා දෙපාර්තමේන්තුව යන ආයතනවල නිලධාරීන් මෙම අවස්ථාවට සහභාගී වී සිටියා.
