කොළඹ සහ අවට ප්‍රදේශ කිහිපයකට බලපෑ අධික සුළං සහිත කාළගුණයත් හේතුවෙන් ස්ථාන කිහිපයක ගස් කඩාවැටීම් ඇතුළු අනතුරු කිහිපයක් වාර්තා වී තිබෙනවා.
මෙම අනතුරුවලින් තුවාල ලැබූ පුද්ගලයන් 05 දෙනෙක් රෝහල් ගතකර ඇති බවයි වාර්තා වුණේ.
වැසි සමඟ ඇති වූ තද සුළං නිසා ගස් කඩා වැටීම් හේතුවෙන් රීඩ් මාවත, ජාවත්ත පාර, කිංසි පාර සහ හෝර්ටන් පෙදෙස ඇතුළු කොළඹ මාර්ග කිහිපයක ගමනාගමනයට අද (30) පස්වරුවේ සිට බාධා එල්ල වී තිබෙනවා.
මේ අතර බස්නාහිර, සබරගමුව, මධ්‍යම සහ වයඹ පළාත්වලත් ගාල්ල සහ මාතර දිස්ත්‍රික්කවලත් ඉදිරි පැය 36ක කාලය තුළ විටින් විට වැසි හෝ ගිගුරුම් සහිත වැසි ඇති විය හැකි බව කාලගුණ විද්‍යා දෙපාර්තමේන්තුව දැනුම් දෙනවා.
එම දෙපාර්තමේන්තුව සඳහන් කළේ බස්නාහිර සහ සබරගමුව පළාත්වලත් නුවරඑළිය, මහනුවර, ගාල්ල, සහ මාතර දිස්ත්‍රික්කවලත් ඇතැම් ස්ථානවල මිලි මීටර් 100ට වඩා තද වැසි ඇති විය හැකි බවයි.
උතුරු මැද පළාතේත් මන්නාරම සහ හම්බන්තොට දිස්ත්‍රික්කවලත් වැසි වාර කිහිපයක් ඇති විය හැකි අතර, මධ්‍යම කඳුකරයේ බටහිර බෑවුම් ප්‍රදේශවලත් උතුරු, උතුරුමැද සහ වයඹ පළාත්වලත් හම්බන්තොට සහ ත්‍රිකුණාමලය දිස්ත්‍රික්කවලත් විටින් විට හමන පැයට කිලෝ මීටර් 50-60ක තද සුළං ඇති විය හැකියි.
දිවයිනේ සෙසු ප්‍රදේශවල විටින් විට හමනපැයට කිලෝ මීටර් 30-40ක පමණ තද සුළං ඇති විය හැකි බවයි කාලගුණ විද්‍යා දෙපාර්තමේන්තුව සඳහන් කළේ.
