26 වැනි “එක්ස්පෝ කලිනරි” (Expo Culinaire ) ජාත්‍යන්තර සූපවේදී තරගාවලියට ශ්‍රී ලංකාව නියෝජනය කරමින් සහභාගී වූ, සූපවේදිනියන් තිදෙනෙකු රන් පදක්කම් 04 ක්, රිදී පදක්කම් 03ක් සහ ලෝකඩ පදක්කම් 03ක් දිනා ගෙන අද (29) දින අලුයම කටුනායක ගුවන් තොටුපොළ වෙත පැමිණියා.
මෙම තරගාවලිය එක්සත් එමීර් රාජ්‍යයේ, සාජා නුවර ලෝකයේ රටවල් 20ක තරගකරුවන් දහසකට අධික පිරිසකගේ සහභාගීත්වයෙන් ඉකුත් මැයි 21 සිට 23 දක්වා පැවැත්වුණා.
එහිදී කස්තුරි රාමේෂ්වරන් සූපවේදිනිය රන් පදක්කමක්, රිදී පදක්කමක් සහ ලෝකඩ පදක්කම් 02 දිනා ගැනීමට සමත් වීම කැපී පෙනුණා.
යාපනය ප්‍රදේශයේ පදිංචි ඇය එම ප්‍රදේශයේ සූපවේදී පාඨමාලා හදාරන ආයතනයක් පවත්වා ගෙන යන්නියක්.
එමෙන්ම මීගමුව ප්‍රදේශයේ පදිංචිකාරිනියක වන එෆ්.නිලූෆා රන් පදක්කමක්, රිදී පදක්කමක් සහ ලෝකඩ පදක්කමක් මෙම තරගාවලියේ දී දිනා ගැනීමට සමත් වුණු අතර ඇය ද මීගමුව ප්‍රදේශයේ සූපවේදී පාඨමාලා හදාරන ආයතනයක් පවත්වා ගෙන යනවා.
එම්.ආර්.එෆ්.ෆස්ලියා මෙම තරගාවලියේ දී රන් පදක්කම් 02 ක් සහ රිදී පදක්කම් 01 ක් දිනා ගැනීමට සමත් වී සිටියා.
ඇය කොළඹ ප්‍රදේශයේ පදිංචිකාරිනියක වන අතර, ඇය හට ද සූපවේදී පාඨමාලා ආයතනයක් සතු වනවා.
මොවුන් තිදෙනාම පළමු වරට මෙවැනි ජාත්‍යන්තර තරගාවලියකට ඉදිරිපත් ව, එහිදී මෙවන් ජයග්‍රහණයන් ලබා ගැනීම විශේෂත්වයක්.
