පාකිස්තාන සුපර් ලීගයේ අවසන් මහා තරගය ජය ගනිමින් එහි ශූරතාව දිනා ගැනීමට ඊයේ (25) රාත්‍රියේ දී Lahore Qalandars කණ්ඩායම සමත් වුණා.
අවසන් මහා සටන පැවැත්වුණේ ලාහෝර් නුවරදියි.
පළමු ව පන්දුවට පහර දුන් Quetta Gladiators කණ්ඩායම නියමිත පන්දුවාර 20 අවසානයේ දී කඩුලු 09ක් දැවී ලකුණු 201ක් ලබා ගත්තා.
හසාන් නවාස් ලකුණු 76යි.
ලාහෝර් ක්ලැන්ඩර්ස් කණ්ඩායම වෙනුවෙන් ශහීන් ෂා අෆ්‍රිඩි කඩුලු තුනක් සහ කඩුලු දෙක බැගින් සල්මන් මිස්‍රා හා හැරිස් රවුෆ් විසින් බිඳ හෙලනු ලැබුවා.
එක් කඩුල්ල බැගින් සිකන්දර් රාසා සහ රිෂාඩ් හුසේන් බිඳ දැමුවා.
ජයග්‍රහණයට ලකුණු 202ක ඉලක්කයක් හඹා ගිය ලාහෝර් කණ්ඩායමේ මැද පෙළ පසුගාමීත්වයක් දරන විටදීත් කුසලානය තම කණ්ඩායමට දිනා දීමට ශ්‍රී ලංකාවෙන් ලාහෝර් ක්ලැන්ඩර්ස් කණ්ඩායම නියෝජනය කරන කුසල් ජනිත් පෙරේරා සමත් වුණා.
තරගයේ ජය ලබන තුරු ම නොනැවතුණු වේගවත් පිතිහරඹයක නිරත වුණු කුසල් පෙරේරා නොදැවී ලකුණු 62ක් රැස් කළේ පන්දු 31කට මුහුණදෙමින්.
ඊට හයේ පහර හතරක් සහ හතරේ පහර පහක් ඇතුළත් වුණා.
සිකන්දර් රාසා නොදැවී ලකුණු 22යි.
මොහොමඩ් නයීම් ලකුණු 46ක් සහ අබ්දුල්ලාහ් ශෆික් ලකුණු 41ක් රැස් කළා.
කඩුලු බිඳ දැමීමේ දී එක් කඩුල්ල බැගින් මොහොමඩ් අමීර්, ෆහීම් අශ්‍රාෆ්, අබ්‍රාර් අහමඩ් සහ උස්මන් ටරික් විසින් බිඳ හෙලනු ලැබුවා.
ඒ අනුව කුසල් ජනිත් පෙරේරාගේ සුපිරි ඉනිමෙන් ලාහෝර් ක්ලැන්ඩර්ස් කණ්ඩායම 2025 පාකිස්තාන සුපර් ලීගයේ ශූරතාව දිනා ගත්තා.
තරගයේ වීරයා කුසල් පෙරේරා.
තරගාවලියේ වීරයා හසාන් නවාස්.
