රජයේ වෛද්‍ය නිලධාරීන්ගේ සංගමය හෙට (05) දින සිට දියත් කිරීමට සැලසුම් කර තිබූ දීපව්‍යාප්ත වැඩවර්ජනය අත්හිටුවීමට තීරණය කර තිබෙනවා.
සෞඛ්‍ය අමාත්‍ය වෛද්‍ය නලින්ද ජයතිස්ස මහතා සමග පැවැති සාකච්ඡාවෙන් අනතුරුව මෙම තීරණය ගත් බවයි රජයේ වෛද්‍ය නිලධාරීන්ගේ සංගමයේ ලේකම් වෛද්‍ය ප්‍රභාත් සුගතපාල මහතා පැවසුවේ.
තමන්ගේ සංගමය සමග සාකච්ඡා කිරීමට පූර්වයෙන් සෞඛ්‍ය අමාත්‍යවරයා ජනාධිපතිවරයා ද හමු වූ බව ද රජයේ වෛද්‍ය නිලධාරීන්ගේ සංගමය ප්‍රකාශ කළා.
නව රජයේ අයවැය හරහා මූලික වැටුප් වැඩි කිරීම ගැන සතුටු වන බවත් රාජකාරී දීමනා, නිවාඩු දීමනා සම්බන්ධයෙන් උද්ගත වූ ගැටලුවලට නිසි විසඳුම් නොලැබීම මත වැඩ වර්ජනයකට අවතීර්ණ වීමට සාකච්ඡා කළේ තම සංගමයේ මධ්‍යම කාරක සභාව ද කැඳවීමෙන් පසුව බවයි GMOA පැවසුවේ.
නමුත් සෞඛ්‍ය අමාත්‍යවරයා වෛද්‍යවරුන්ගේ ඉල්ලීම්වලට සාධාරණයක් ඉටු කිරීමට පොරොන්දු වීමත් එයට කාලයක් ඉල්ලා සිටීමත් මත තාවකාලික ව වැඩ වර්ජනයෙන් ඉවත් වූ බව ද රජයේ වෛද්‍ය නිලධාරීන්ගේ සංගමය සඳහන් කළා.
