පැමිණිල්ලක් විභාග කිරීමට තිස්සමහාරාම ප්‍රදේශයේ නිවසකට ගොස් එහි සිටි 16 හැවිරිදි දැරියකට කාමරයක් තුළද ලිංගික අතවර කිරීමේ සිද්ධියක් සම්බන්ධයෙන් පොලිස් නිලධාරියෙක් අත්අඩංගුවට ගත් බව තිස්සමහාරාම පොලිසිය පවසනවා.
මෙලෙස අත්අඩංගුවට ගෙන ඇත්තේ තිස්සමහාරාම පොලිසියට අනුයුක්තව රාජකාරී කරමින් සිටි සැරයන්වරයෙක්.
තිස්සමහාරාමයේ පදිංචි අදාළ දැරිය නිවස තුළ කලහකාරී ලෙස හැසිරෙන බවට ඊයේ (02) රාත්‍රියේ පොලිස් හදිසි ඇමතුම් අංශය 119 වෙත ලද දැනුම් දීමකට අනුව පොලිසියේ රාත්‍රී ජංගම සංචාර රාජකාරියේ යෙදී සිටි සැකකාර සැරයන්වරයා දැරියගේ නිවසට ගොස් සිද්ධිය සම්බන්ධයෙන් විමර්ශනයක් ආරම්භ කර ඇතැයි පොලිසිය සඳහන් කරනවා.
දැරිය උපකාරක පංතියකට යන බව පවසා ඒ පෙම්වතා සමඟ කිරින්ද ප්‍රදේශයට ගොස් ඇති බවට මවට සැලවීමත් සමඟ ම ඒ සම්බන්ධයෙන් තොරතුරු විමසීමේ දී දැරිය නිවස තුළ කලහකාරී ලෙස හැසිරී ඇතැයි වාර්තා වනවා.
සිද්ධිය සම්බන්ධයෙන් දැරියගෙන් තොරතුරු විමසීම සඳහා සැකකාර සැරයන්; දැරිය රැඳී සිටි කාමරය වෙත ගොස් ඇය සමඟ කතා කරමින් සිටින අතරතුර ලිංගික අතවර කළ බවට පොලිස් ස්ථානය වෙත කර තිබූ පැමිණිල්ලකට අනුව සැකකාර සැරයෙන් අත්අඩංගුවට ගෙන තිබෙනවා.
