ඊයේ (18) රාත්‍රියේ මිද්දෙණිය පොලිස් වසමේ කඩේවත්ත හන්දියේ දී සිදු කළ වෙඩි තැබීමෙන් මියගිය අරුණ විදානගමගේ නොහොත් කජ්ජා නමැත්තා සිය මුහුණුපොතේ ජීවිතක්ෂයට පත් වීමට දින තුනකට පෙර තැබූ සටහනක් මේ වනවිට (19) ශීඝ්‍රයෙන් සමාජ මාධ්‍ය තුළ සංසරණය වෙමින් පවතිනවා.
මරණකරු සඳහන් කර ඇත්තේ; ”ඈත පේන මරනෙ ගැන හිතන්නෙ නැතුව. ළඟ තියන ජීවිතය ගැන හිතලා සතුටින් ඉදපල්ලා..(නොහැක්කක් නොමැත.)” යනුවෙන්.
එම සටහන සමග ඔහු වාහනයක අසුන්ගෙන සිටින දර්ශනයක් ඇතුළත් ඡායාරූපයක් ද මුහුණුපොතට එක් කර තිබෙනවා.
ඉන් හරියටම දින තුනකට පසුව කජ්ජා නමැති මෙම මරණකරු තම සය හැවිරිදි දියණිය සහ කුඩා පුතු සමග යතුරුපැදියෙන් ගමන් කරමින් සිටියදියි වෙඩි ප්‍රහාරයට ගොදුරු වූයේ.
එම වෙඩි ප්‍රහාරයෙන් 39 හැවිරිදි අරුණ විදානගමගේ නොහොත් කජ්ජා නමැත්තේ එම ස්ථානයේදීම මියගිය අතර බරපතළ තුවාල ලැබූ පුතු ඇඹිලිපිටිය රෝහලටත් දියණිය තංගල්ල රෝහලටත් ඇතුළත් කෙරුණා.
නමුත් රෝහලේ දී සය හැවිරිදි වියේ පසුවූ දියණිය අද අලුයම මියගොස් ඇති අතර මිද්දෙණිය පොලිසිය අප කළ විමසීමක දී පැවසුවේ බරපතළ තත්ත්වයේ පසුවන පුතු සැත්කමකට භාජනය කර ඇති බවයි.
යතුරුපැදියකින් ගමන් කරමින් සිටි අරුණ නමැත්තා හට නාඳුනන පුද්ගලයින් පිරිසක් විසින් මෙලෙස වෙඩි තබා පලාගොස් තිබුණා.
මරණකරුවන් ගල්පොත්ත ප්‍රදේශයේ පදිංචිකරුවන්.
මෙම වෙඩිතැබීම සඳහා ටී-56 වර්ගයේ ගිනිඅවියක් භාවිතා කර ඇති බවට පොලීසිය පවසනවා.
වෙඩි තැබීමට හේතුව මෙතෙක් හෙළි ව නැති අතර සැකකරුවන් අත් අඩංගුවට ගැනීමට පොලිස් විමර්ශන ක්‍රියාත්මකයි.
