යෝෂිත රාජපක්ෂ මහතාගේ මිත්තණිය වන ‘ඩේසි ආච්චී’ හෙවත් ඩේසි ෆොරස්ට් මහත්මියට එරෙහිව විදෙස් ගමන් තහනමක් පනවා තිබෙනවා.
අද (11) පෙරවරුවේ මීට අදාළ නඩු කටයුත්ත කඩුවෙල මහේස්ත්‍රාත් අධිකරණය හමුවේ කැඳවූ අවස්ථාවේදියි අධිකරණයෙන් අදාළ නියෝගය නිකුත් කරනු ලැබුවේ.
යෝෂිත රාජපක්ෂ සහ ඔහුගේ මිත්තණිය සතුව තිබූ රුපියල් මිලියන 59ක ඒකාබද්ධ ගිණුමක් සම්බන්ධයෙන් මුදල් විශුද්ධිකරණ පනත යටතේ වන නඩුවක් විභාග කරමිනුයි මෙලෙස අධිකරණයෙන් විදෙස් ගමන් තහනමක් යෝෂිතගේ මිත්තණියට නියම වූයේ.
2016 වසරේ සිට සිදුකළ විමර්ශන අනුව යෝෂිත රාජපක්ෂට මුදල් ගිණුමට ලැබුණු ආකාරය සම්බන්ධව සාධාරණ පැහැදිලි කිරීමක් සිදු කිරීමට නොහැකි වූ බැවින් ඔහුට එරෙහිව මුදල් විශුද්ධීකරණ පනත යටතේ නඩු පැවරීමට පොලීසිය කටයුතු කර තිබුණා.
මෙම මුදල් ස්ථීර තැන්පතු සහ බැංකු තැන්පතුවල යොදවා තිබී ඇති අතර එහිදී ඩේසි ෆොරස්ට් නම් තැනැත්තිය සමග හවුල් ගිණුමක් වශයෙන් මෙම ගිණුම් පවත්වා ගෙන ගොස් ඇති බවත් අනාවරණය වී ඇති බවයි වාර්තා වන්නේ.
ඒ අනුව නීතිපතිවරයා විසින් ඩේසි ෆොරස්ට් නම් කාන්තාවත් මේ සඳහා සැකකාරියක් වශයෙන් නම් කිරීමට පොලීසියට උපදෙස් ලබා දී තිබුණා.
ඒ අනුව අද (11) දින යෝෂිත රාජපක්ෂ සහ ඩේසි ෆොරස්ට් නම් කාන්තාවට එරෙහිව කඩුවෙල මහෙස්ත්‍රාත් අධිකරණයේ දී සැකකරුවන් වශයෙන් නම් කර මුදල් විශුද්ධීකරණ පනත යටතේ ඔවුන්ට එරෙහිව මෙලෙස නඩු පැවරීමට පොලීසිය විසින් කටයුතු කරනු ලැබුවේ.
