නොරොච්චෝලේ තාප විදුලි බලාගාරය යළි ජාතික විදුලිබල පද්ධතියට එක්කරන තෙක් විදුලි කප්පාදුවක් සිදුකිරීමට අවශ්‍ය ද නැද්ද යන්න සම්බන්ධයෙන් තීරණය අද (10) දිනයේ ප්‍රකාශයට පත්කරන බව ලංකා විදුලි බල මණ්ඩලය පවසනවා.
පවතින තත්වය තුළ ඇති විය හැකි හදිසි විදුලිය බිඳ වැටීම් සම්බන්ධයෙන් ද අධ්‍යයනය කරමින් සිටින බවයි එම මණ්ඩලය සඳහන් කළේ.
පානදුර ග්‍රීඩ් උපපොළේ ඇති පද්ධතියේ වඳුරෙකු ගැටීමෙන් ඇති වූ හදිසි ආපදා තත්ත්වයක් ඇති වුණා.
ඒ, සමඟ විදුලි බල පද්ධතියේ හටගත් සමතුලිතතාව හේතුවෙන් විදුලිය සැපයුම අඩාල වූ බවයි බලශක්ති අමාත්‍ය ඉංජිනේරු කුමාර ජයකොඩි සඳහන් කළේ.
සමස්ත දිවයිනටම ඊයේ (09) පෙරවරුවේ සිදු වූ විදුලිය බිඳ වැටීම පැය 05ක පමණ කාලයක් පැවති අතර, රාත්‍රී 9.45 පමණ වන විට දිවයින පුරා විදුලිබල සැපයුම යළි යථාතත්වයට පත්කිරීමටයි විදුලි බල මණ්ඩලය කටයුතු කළේ.
මේ අතර විදුලි බල මණ්ඩලය සඳහන් කරන්නේ මේ වනවිට අක්‍රීයව පවතින නොරොච්චෝලේ තාප විදුලි බලාගාරය යළි සම්පූර්ණ වශයෙන් ක්‍රියාත්මක කිරීමට දින හතරක පමණ කාලයක් ගතවනු ඇති බවයි.
