තෙරපිවරියන් ලෙස රැකියා ලබාදෙන බවට පවසා ඉන්දුනීසියාවේ සිට ගෙන්වා ගත් විදේශීය ජාතික තරුණියන් තිදෙනෙක් වෛශ්‍ය වෘත්තීයෙහි යෙදවූවයි කියන සිද්ධිය සම්බන්ධයෙන් වරදකරු කරනු ලැබූ සම්බාහන මධ්‍යස්ථානයක හිමිකරුවකුට කොළඹ ප්‍රධාන මහාධිකරණ විනිසුරු ආදිත්‍ය පටබැඳිගේ මහතාඅද (24) බරපතල වැඩ සහිත වසර 15ක සිර දඬුවම් ලබාදීමට නියෝග කළා.
මොහොමඩ් හනිපා මොහොමඞ් සෙයික් නැමති එම විත්තිකරුට එරෙහිව නීතිපතිවරයා ගොනුකර ඇති අධි චෝදනා පැමිණිල්ල විසින් සාධාරණ සැකයකින් තොරව ඔප්පු කර ඇති බවට නිගමනය කරන බවට ප්‍රකාශ කළ විනිසුරුවරයා එම චෝදනා තුනටම බරපතළ වැඩ සහිත වසර පහ බැගින් සිර දඬුවම් නියම කර එම සිර දඬුවම් කාලය එකවර එනම් වසර පහකින් ගෙවී යන ලෙස ලබාදීමට ද නියෝග කරනු ලැබුවා.
එම වින්දිත තරුණියන් තිදෙනාට රුපියල් ලක්ෂ දෙකහමාර බැගින් වන්දියක් ගෙවීමට ද විත්තිකරු වෙත නියම කළ විනිසුරුවරයා එම වන්දි නොගෙවන්නේ නම් වසර බැගින් ලිහිල් සිර දඬුවම් ලබාදීමට ද නියෝග කළා.
පසුගිය 2021 වසරේදී දූෂණ මර්දන ඒකකය විසින් මෙම වැටලීම සිදුකර තිබූ අතර, රජයේ අධිනීතීඥ නිමේෂා ද අල්විස් නීතිපතිවරයා වෙනුවෙන් අධිකරණය හමුවේ පෙනී සිටියා.
