ඊයේ (23) දිනයේ ප්‍රතිඵල නිකුත් වූ 2024 පහ ශ්‍රේණිය ශිෂ්‍යත්ව විභාගයෙන් සිසුන් 18 දෙනෙක් ඉහළම ලකුණු ලබාගෙන සිටින බව විභාග කොමසාරිස් ජනරාල් අමිත් ජයසුන්දර පවසනවා.
අද (24) පෙරවරුවේ පැවති විශේෂ මාධ්‍ය හමුක දී කොමසාරිස්වරයා මේ බව සඳහන් කළා.
2024 පහ ශ්‍රේණිය ශිෂ්‍යත්ව විභාගයේ වැඩි ලකුණු ලාභියා ලකුණු 188ක් ලබාගෙන ඇති බවයි කොමසාරිස්වරයා වැඩිදුරටත් සඳහන් කර සිටියේ.
මේ අතර අධිකරණ තීන්දුව ලැබීමෙන් පසු දින 23ක් ඇතුළත විභාග ප්‍රතිඵල නිකුත් කිරීමට හැකි වූ බවත්, ඉතාම කෙටි කාලයකින් ශිෂ්‍යත්ව විභාග ප්‍රතිඵල නිකුත් හැකි වූ වසර මෙය බව ද ඔහු පැවසුවා.
එමෙන්ම වැඩිම ලකුණු ලබාගත් දරුවන් 18 දෙනාගෙන් 11 දෙනෙකු පිරිමි දරුවන් සහ 07 දෙනෙක් ගැහැණු දරුවන් බව ද ඔහු සඳහන් කළා.
2024 ශිෂ්‍යත්ව විභාගයට අපේක්ෂකයින් 319,284ක් පෙනී සිටි අතර, ඉන් සිසුන් 51,244ක් සමත්ව ඇති අතර, එය ප්‍රතිශතයක් ලෙස 16.05%ක් වනවා.
පසුගිය වසරට සාපේක්ෂව මෙය වැඩිවීමක් බවයි විභාග කොමසාරිස් ජනරාල්වරයා පවසා සිටියේ.
මේ අතර ප්‍රතිපත්තිමය තීරණයක් මත වැඩිම ලකුණු ලබාගත් දරුවන් පිළිබදව අනාවරණය නොකරන බව ද ඔහු මෙම මාධ්‍ය හමුවේ දී අවධාරණය කර සිටියා.
