ඉදිරි තෙමසක කාලය තුළ මෙරටට අමෙරිකානු ඩොලර් මිලියන 200ක ප්‍රදානයක් හිමිවන බව ලෝක බැංකුව සහතික කර තිබෙනවා.
මෙරට ක්‍රියාත්මක ව්‍යාපෘති තුනකට අදාළව මෙම මූල්‍ය ප්‍රතිපාදන වෙන් කරන බවත් ඒ අනුව ලෝක බැංකුව තවදුරටත් ශ්‍රී ලංකාව සමග එකී ක්ෂේත්‍රවල ඇති සහයෝගය තහවුරු කරන බවට ද දැනුම්දී ඇති බවයි වාර්තා වන්නේ.
මෙම ව්‍යාපෘති ග්‍රාමීය සංවර්ධනයට සහ අධ්‍යාපනයට සහාය වන අතර පුනර්ජනනීය බලශක්තිය සඳහා පෞද්ගලික ආයෝජන ආකර්ෂණය කර ගැනීම සඳහා පහසුකමක් ස්ථාපිත කරනු ඇති.
ලෝක බැංකුවේ දකුණු ආසියානු උප සභාපති මාටින් රයිසර් මහතා සිය දෙදින ශ්‍රී ලංකා සංචාරය අද (22) දින නිමා කරමින් මේ බව සඳහන් කළා.
සිය දින දෙකක ශ්‍රී ලංකා සංචාරය තුළ ඔහු ජනාධිපති අනුර කුමාර දිසානායක, අග්‍රාමාත්‍ය හරිනි අමරසූරිය සහ අනෙකුත් රාජ්‍ය නිලධාරීන්, පෞද්ගලික ආයෝජකයින් සහ සංවර්ධන හවුල්කරුවන් හමු වී ශ්‍රී ලංකාවේ ආර්ථික ප්‍රකෘතිය සහ දිගුකාලීන වර්ධනය සඳහා රට දරන අඛණ්ඩ උත්සාහයන් පිළිබඳව සාකච්ඡා කර ඇති බවයි රජය සඳහන් කරන්නේ.
රයිසර් මහතාගේ මෙම සංචාරයේ දී අවධානය යොමු වූ ප්‍රධාන ක්ෂේත්‍ර අතරට දරිද්‍රතාව අඩු කිරීම, ඩිජිටල් සංවර්ධනය සහ ක්ලීන් ශ්‍රී ලංකා මුලපිරීම සඳහා රජයේ කැපවීම ඇතුළත්.
