පුද්ගලයින් විදෙස්ගත කරන බවට පවසා මූල්‍ය වංචා සිදු කරමින් වව්නියාවේ නිවසක සැඟව සිටි වරෙන්තු 30ක් පවතින අඹු – සැමි යුවළක් පොලිස් අත්අඩංගුවට ගෙන තිබෙනවා.
අද (21) දහවල් මෙම සැකකරු සහ සැකකාරිණිය අත් අඩංගුවට ගත් බවයි වව්නියාව පොලිසිය පැවසුවේ.
මෙම යුවළ පුද්ගලයින්ව රුමේනියාවේ රැකියා සඳහා යවන බවට දන්වමින් රුපියල් කෝටි 03කට ආසන්න මුදලක් වංචා කර තිබෙන බවට පැමිණිලි ලැබී තිබෙනවා.
සැකකාර අඹු – සැමි යුවළට විරුද්ධව ඒරාවුර් අධිකරණය තුළ වරෙන්තු 30ක් ඇති බවත්, ස්වාමිපුරුෂයාට විරුද්ධව වරෙන්තු 16 ක් ද, බිරිඳට එරෙහිව වරෙන්තු 14 ක් ද පවතින බව හෙළි ව තිබෙන බවයි දසත ප්‍රාදේශීය වාර්තාකරු සඳහන් කළේ.
අත්අඩංගුවට ගත් පිරිමි පුද්ගලයා වයස අවුරුදු 55ක පුද්ගලයෙකු වන බවත්, බිරිඳ වයස අවුරුදු 48ක තැනැත්තියක් වන බව ද පොලිසිය සඳහන් කළා.
අත්අඩංගුවට ගත් සැකකරුවන් පුද්ගලයින් 28 දෙනෙකුට වැඩි පිරිසක් විදෙස්ගත කරන බවට පවසා මුල්‍ය වංචා සිදුකර ඇති බව ද අනාවරණය වී තිබෙනවා.
සැකකරුවන් වවුනියාව මහේස්ත්‍රාත් අධිකරණයට ඉදිරිපත් කිරීමට නියමිතයි.
