යුරෝපා සංගම් මැතිවරණ නිරීක්ෂණ මෙහෙයුමේ ප්‍රධාන නිරීක්ෂක, යුරෝපීය පාර්ලිමේන්තු මන්ත්‍රී ජෝස් ඉග්නාසියෝ සැන්චෙස් අමෝර්, ඇතුළු නියෝජිත පිරිසක් කතානායක වෛද්‍ය ජගත් වික්‍රමරත්න හමු වී තිබෙනවා.
පසුගිය දා (17) පාර්ලිමේන්තුවේ දී මෙම හමුව සිදුව ඇති බවයි වාර්තා වුණේ.
මෙම හමුවේ දී පළමුව කතානායකවරයා ඇතුළු නව රජය වෙත යුරෝපා සංගම් මැතිවරණ නිරීක්ෂණ මෙහෙයුමේ ප්‍රධාන නිරීක්ෂකවරයා සිය සුබ පැතුම් එක් කර සිටියා.
අනතුරුව යුරෝපා සංගම් මැතිවරණ නිරීක්ෂණ මෙහෙයුම් කණ්ඩායම විසින් සකස් කළ 2024 ජනාධිපතිවරණ නිරීක්ෂණ ඇතුළත් අවසන් වාර්තාව කතානායකවරයා වෙත පිළිගන්වනු ලැබුවා.
ප්‍රජාතන්ත්‍රවාදීව මැතිවරණය පැවැත්වීම පිළිබඳව යුරෝපා සංගම් මැතිවරණ නිරීක්ෂණ මෙහෙයුමේ ප්‍රධාන නිරීක්ෂකවරයාගේ ප්‍රසාදය මෙහිදී හිමිවුණා.
මෙම හමුවේ දී මැතිවරණ කොමිෂන් සභාවේ කාර්යභාරය අගය කළ ඔහු, තවදුරටත් එම කොමිෂන් සභාව ශක්තිමත් කිරීමේ වැදගත්කම පෙන්වා දුන්නා.
එමෙන්ම වර්තමාන පාර්ලිමේන්තුව තුළ කාන්තා නියෝජනය ඉහළ අගයක පැවතීම පිළිබඳව ද ඒ ඔහු සිය ප්‍රසාදය පළ කළා.
මෙහීදී අදහස් දක්වමින් කථානායකවරයා, යුරෝපා සංගම් මැතිවරණ නිරීක්ෂණ මෙහෙයුම විසින් ඔවුන්ගේ අත්දැකීම බෙදාගැනීම පිළිබඳව සිය ස්තුතිය පළ කළා.
වර්තමානය වනවිට සැබෑ ප්‍රජාතන්ත්‍රවාදී ගුණාංගයන්ගෙන්, වඩාත් විනිවිදභාවයකින් යුක්තව, දූෂණයෙන් තොර පාලනයක් කරා රජය කටයුතු කරමින් සිටින බව මෙහි දී කතානායකවරයා අවධාරණය කර සිටියා.
මේ අතර ආබාධ සහිත පාර්ලිමේන්තු මන්ත්‍රීවරයන්ගේ සමුළුවක් පළමු වරට මෙරට දී පැවැත්වීමට අවශ්‍ය සැළසුම් සකස් කරමින් සිටින බව ද මෙහි දී කතානායකවරයා වැඩිදුරටත් අදහස් දක්වමින් පැවසුවා.
