සුනඛයින් දෙදෙනෙකු සමඟ ලොරි රථයකින් සහල් තොගයක් ප්‍රවාහනය කර බලංගොඩ නගරයේ ඇති වෙළෙඳසැල්වලට බෙදාහරිමින් සිටි පුද්ගලයින් දෙදෙනෙකුට රුපියල් දසදහස බැගින් වූ දඩ මුදලක් සහ වසර 03ක බරපතළ වැඩ සහිත සිරදඬුවම් වසර 05කට අත්හිටුවීමට බලංගොඩ මහෙස්ත්‍රත්වරිය අද (10) නියෝග කළා.
එක් අයෙකු වෙනුවෙන් නියම කළ රුපියල් දසහසක දඩ මුදල නොගෙවන්නේ නම් තවත් මසක කාලයක සිහිල් සිරදඬුවම් නියම කිරීමටයි අධිකරණය නියෝග කර සිටියේ.
එමෙන්ම සහල් තොග අධිකරණය භාරයේ තබන ලෙසත්, ලොරි රථය රැපියල් ලක්ෂ 05ක බැඳුම්කරයක් මත නිදහස් කරන ලෙසට ද මෙහිදී නියෝග කෙරුණා.
අදාළ සහල් තොගය සත්ව ආහාර වශයෙන් සතුන්ගේ පරිභෝජනය සඳහා මුදාහැරීමට ප්‍රධාන ආහාර බලධාරියා ලෙස සලකන සෞඛ්‍ය සේවා අධ්‍යක්ෂ ජෙනරාල්වරයාගේ වාර්තාවක් කැඳවා ලබන 31 වනදා අධිකරණයට ඉදිරිපත් කරන ලෙස ද මෙහිදී මහජන සෞඛ්‍ය පරීක්ෂකවරුන් වෙත දැනුම් දෙනු ලැබුවා.
රුපියල් ලක්ෂ විසි හතරක් වටිනා අදාළ සහල් තොගය ඉකුත් 04 වනදා තිස්සමහාරාම ප්‍රදේශයේ සිට සුනඛයින් දෙදෙනකු සමඟ ප්‍රවාහනය කර බලංගොඩ නගරයේ ඇති වෙළඳසැලට බෙදාහරිමින් සිටිය දී බලංගොඩ සෞඛ්‍ය වෛද්‍ය නිලධාරී කාර්යාලයේ නිලධාරින් විසින් මෙම වැටලීම සිදුකර තිබුණා.
අනතුරුව බලංගොඩ සෞඛ්‍ය වෛද්‍ය නිලධාරිනි වෛද්‍ය කේ.එස්.ඩි.පි.කණ්ඩුලගේ උපදෙස් පරිදි වැඩ බලන පරිපාලන මහජන සෞඛ්‍ය පරික්ෂක විරසේකර ,ඒ.එමි.සී.එල්. ආදාදොළ, ඒ.වි.ඒ.පී. ගුණරත්න , ජී.සි.එම්.සෝමතුංග යන මහජන සෞඛ්‍ය පරික්ෂක නිලධාරින් විසින් එම වැටලීම සිදුකර සැකකරුවන්ට එරෙහිව නඩු පවරනු ලැබුවා.
රත්නපුර ප්‍රදේශිය සෞඛ්‍ය සේවා අධ්‍යක්ෂක වෛද්‍ය අනෝජ රොද්‍රිගෝගේ උපදෙස් පරිදි රත්නපුර ආහාර හා ඖෂධ පරික්ෂක ජේ.කේ.පි.ප්‍රියකුමාර අධිකරණ කටයුතු මෙහෙයවනු ලැබුවා.
