ආගමට අපහාසයක් සිදු කොට ආගමික සංහිඳියාවට බාධා කළේ යැයි චෝදනා ලද බොදු බල සේනා සංවිධානයේ නායක ගලබඩඅත්තේ ඥානසාර හිමිට මාස 09ක ලිහිල් වැඩ සහිත සිර දඬුවමක් කොළඹ අතිරේක මහේස්ත්‍රාත් පසන් අමරසේන මහතා අද (09) නියම කළා.
ඉස්ලාම් ආගමට හිතාමතාම, ද්වේෂසහගතව අපහාස කිරීම සිදුකර ඇති බව පවසමින් මෙම දඬුවම නියම කළ මහේස්ත්‍රාත්වරයා ආණ්ඩුක්‍රම ව්‍යවස්ථාවෙන් ජනතාවට ලබා දී ඇති ආගමික නිදහස උල්ලංඝනය කිරීම හා ලංකා දණ්ඩ නීති සංග්‍රහයේ ප්‍රතිපාදන ප්‍රකාරව දඬුවම් ලැබිය යුතු වරදක් සිදු කිරීම ඇතුළු චෝදනාවලට වරදකරු කරමින් මහේස්ත්‍රාත්වරයා මෙම තීන්දුව නිකුත් කෙරුණා.
ඥානසාර හිමියන් අධිකරණයේ පෙනී සිටීමෙන් පසුව මෙම තීන්දුව ප්‍රකාශයට පත් කළ බවයි දසත අධිකරණ වාර්තාකරු පැවසුවේ.
අදාළ චෝදනාවන්ට වරදකරු කිරීමෙන් පසුව අධිකරණය මගින් දඬුවම් ලබාදීමට පෙර විත්ති කූඩුවේ සිට ඥානසාර හිමියන් මහේස්ත්‍රාත්වරයා හමුවේ මෙසේ පැවසුවා.
“බෞද්ධ භික්‍ෂුවක් වන තමන් වසර 20 තිස්සේ ඉස්ලාමීය අන්තවාදයට එරෙහිව කටයුතු කරන බවත්,සැරින් සැරේ මෙලෙස කෙනෙහිලිකම් නොකර එකපාර මරා දැමීමට නියෝග කරන ලෙසත් අධිකරණයෙන් ඉල්ලා සිටියා.
ඊට ප්‍රතිචාර දැක්වූ මහේස්ත්‍රාත්වරයා සඳහන් කර සිටියේ ලබා දුන් තීන්දුවට හෝ නඩුවට අදාළ කාරණයක් නම් සලකා බැලිය හැකි බවත්, තීන්දුවට සෑහීමකට පත් නොවන්නේ නම් අභියාචන කළ හැකි බවත් ය.
නඩුවට අදාළ නොවන පරිබාහිර කාරණා සම්බන්ධයෙන් අධිකරණයට මැදිහත් විය නොහැකි බවත් පෙන්වා මෙහිදී පෙන්වා දී තිබෙනවා.
ඉන්පසුව ඥානසාර හිමියන් විසින් පිටු කිහිපයකින් සමන්විත සංදේශයක් මහේස්ත්‍රාත්වරයාට ඉදිරිපත් කරනු ලැබුවා.
එම සංදේශය කියවා බැලූ මහේස්ත්‍රාත්වරයා එය නීතිපතිවරයාට හා තමන්ට අමතා ඇති බව පෙන්වා දෙමින් මාස 09ක ලිහිල් වැඩ සහිත සිරදඬුවමක් හා රුපියල් 1500ක දඩයක් ද නියම කෙරුණා.
පැමිණිලිකරුට වන්දියක් නියම නොකරන බව ද මහේස්ත්‍රාත්වරයා දැනුම්දුන්නා.
2016 ජූලි මස 08 වැනි දින කිරුළපන පැවැති මාධ්‍ය සාකච්ඡාවේ දී ඉස්ලාම් ආගම සම්බන්ධයෙන් කරන ලද ප්‍රකාශයකින් ආගමික සංහිඳියාව බිඳීයන ආකාරයෙන් කටයුතු කර ඇති බවත්, ඒ අනුව දණ්ඩ නීති සංග්‍රහයේ 291( ආ) වගන්තිය යටතේ දඬුවම් ලැබිය යුතු වරදක් සිදුකර ඇති බවට චෝදනා කරමින් මෙම නඩුව කොළඹ අපරාධ කොට්ඨාසය මගින් පවරා තිබුණා.
