පසුගිය වසර 05ක කාලය තුළ සිදු වූ රිය අනතුරු හේතුවෙන් පුද්ගල ජීවිත 12,140ක සංඛාවක් අහිමි වී ගොස් ඇති බව පොලිසිය පවසනවා.
එමෙන්ම එම කාලය තුළ රිය අනතුරුවලින් බරපතළ තුවාල ලබා ආබාධිත තත්ත්වයට පත් වූ පුද්ගලයින්ගේ සංඛ්‍යාව 90,000 කට ආසන්න බවයි පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී කේ.බී. මනතුංග සඳහන් කළේ.
මෙම රිය අනතුරු අවමකර ගැනීම සඳහා ශ්‍රී ලංකා පොලිසිය විසින් මේ වනවිට රථවාහන මෙහෙයුම් ආරම්භ කර ඇති බව මාධ්‍ය ප්‍රකාශකවරයා වැඩිදුරටත් පවසා සිටියා.
ඒ, අනුව මූලික වශයෙන් මගී ප්‍රවාහන රථවලින් සිදුවන රථවාහන වැරදි අවමකර ගැනීම සඳහා මෙම මෙහෙයුම් මඟින් උත්සාහ දරන බවයි පොලිස් මාධ්‍ය ප්‍රකාශකවරයා පැවසුවේ.
මේ අතර පොලිසිය විසින් මෙම රථවාහන මෙහෙයුම් ආරම්භ කළ දෙසැම්බර් 24 දිනෙන් පසුව දිනකට සිදුවන මාරක රිය අනතුරු සංඛ්‍යාව 04ක් දක්වා අඩු වී ඇති බව ද ඔහු මෙහිදී සඳහන් කළා.
