පවුලක පියා සහ බාල පුතු එක් වී ඔවුන්ගේ වැඩිමහල් පුතුට පහර දී ඝාතනය කර තිබෙනවා.
පූඩළුඔය පොලිසිය පැවසුවේ; 21 හැවිරිදි සික්කන් නඩේෂන් නවීන් කුමාර් නමැති එක් දරු පියෙකු මුගුරුවලින් පහර කා ජීවිතක්ෂයට පත් ව ඇති බවයි.
මෙම පුද්ගලයා පූඩළුඔය – ඩන්සින් වත්ත පහළ කොටසේ පදිංචි ව සිට තිබෙනවා.
පෙරේදා (30) පස්වරුවේ පියා සහ මරණකරු අධික ලෙස මත්පැන් පානය කර සිට ඇති බවත් පියා නිවසට පැමිණෙන අවස්ථාවේ නිවසේ අධික ශබ්දයෙන් වැඩිමහල් පුතු ගීත ශ්රවණය කරමින් සිට ඇති බවත්; කෝලාහලය සිදුවීමට පෙර පියා විසින් මරණකරු වූ පුතුට පවසා ඇත්තේ ශබ්දය අඩු කරන ලෙසටයි.
එම අවස්ථාවේ දී උරණ වූ ලොකු පුත්රයා හෙවත් මරණකරු විසින් පියා හට පහරදී ඇති බවත් පියාගෙ හිස මතට විශාල ගලක් ගෙනැවිත් අතහැර ඇති බවත් වාර්තා වනවා.
මෙම සිදුවීමෙන් උරණ වූ බාල පුතු මුගුරක් ගෙනැවිත් සිය පියා සමග එක් ව වැඩිමහල් සොහොයුරුව ඝාතනය කර ඇත්තේ නිවස ඉදිරිපිට බවයි හෙළිව ඇත්තේ.
කෙසේවෙතත් මරණකරුගේ ප්රහාරවලින් බාල පුතු සහ පියා බරපතළ තුවාල ලැබීම හේතුවෙන් සැකකරුවන් මේ වනවිට (31) පොලිස් ආරක්ෂාව යටතේ කොත්මලේ ප්රාදේශීය රෝහලේ ප්රතිකාර ලබන බවත් වාර්තා වනවා.
ඝාතනයට ලක් වූ එක්දරු පියාගේ සිරුර මහේස්ත්රාත්වරයාගේ ස්ථාන පරික්ෂාවෙන් පසු පශ්චාත් මරණ පරික්ෂණය සඳහා නාවලපිටිය දිස්ත්රික් මහ රෝහල වෙත යොමු කිරීමට නියමිතයි.
