ප්‍රියා දිවිසැරිය නිම කරයි

ප්‍රවීන ගයන ශිල්පී ප්‍රියා සූරියසේන මහතා අභාවප්‍රාප්ත වී තිබෙනවා.

අභාවප්‍රාප්ත වන විට ඒ මහතා 80 වන වියේ පසු වුණා.

කොළඹ ජාතික රෝහලේ ප්‍රතිකාර ලබමින් සිටිය දී ඔහු අද අභාවප්‍රාප්ත වී තිබෙනවා.

1944 ඔක්තෝබර් 27 වන දින ජේමිස් අප්පුහාමිට හා ඒ.එම්.පොඩි මැණිකේට දාව උපන් ප්‍රියදර්ශන සූරියසේන ලියනගේ සිව්දෙනෙකුගෙන් යුත් පවුලේ එකම පුත්‍රයා වනවා.

මාදම්පේ සේනානායක විද්‍යාලයෙන් අධ්‍යාපනය ලැබූ ප්‍රියා සූරියසේන උසස් පෙළින් පඩු රජයේ ‘හේවුඩ්’ සංගීත විද්‍යාලයෙන් සංගීතතය පිළිබඳ ඩිප්ලෝමාවක් ලබාගෙන තිබෙනවා.

අනතුරුව ඔහු අවුරුදු 12ක කාලයක් ගුරු වෘත්තියේ නියැලෙන අතර, 1985 වසරේදී ගුරු වෘත්තියට සමු දී සංගීතවේදියෙකු ලෙස කටයුතු ආරම්භ කරනවා.

මෙරට සංගීත ක්ෂේත්‍රයට ජනප්‍රිය ගීත රැසක් තිළිණ කර ඇති ඔහු චිත්‍රපට පසුබිම් ගායකයෙකු ලෙසත් එළිමහන් ප්‍රසංග වේදිකාවේ අතිශය කාර්යබහුල ගායකයෙකු ලෙසත් ප්‍රසිද්ධව සිටියා.

කැන්දන් යන්නම් රන්මල් මාලා දාලා, සුදු පරවි රෑන සේ, ඈත රන් විමන්, රටකින් එහා ඉගිලී, අඳුර අඳුර මගේ, සරතැස නිවා; වැනි මෙරට ප්‍රේක්ෂකයින් අතර මතයයේ රැඳෙන ජනප්‍රිය ගීත රැසක හිමිකරුවා බවට පත් වුණා.

අභාවප්‍රාප්ත ප්‍රියා සූරියසේන මහතාගේ දේහය හෙට (25) උදෑසන 8.30 සිට පාසල් මාවත, ගංගොඩවිල, නුගේගොඩ පිහිටි ඔහුගේ නිවසේ තැන්පත් කර තැබෙනවා.