එළඹෙන උත්සව සමය තුළ මගී ජනතාවගේ ගමනාගමන කටයුතු වෙනුවෙන් අමතර දුම්රිය ධාවනයට එක් කිරීම දැඩි ගැටළුවක්ව පවතින බව දුම්රිය නියෝජ්‍ය සාමාන්‍ය අධිකාරි එන්.ජේ. ඉදිපොළගේ පවසනවා.
නියෝජ්‍ය සාමාන්‍ය අධිකාරිවරයා සඳහන් කළේ දුම්රිය රියදුරන්, නියාමකවරුන්ගේ පවතින අඩුව සහ දුම්රිය එන්ජින් හිඟයක් පැවතීම මීට හේතු වී ඇති බවයි.
මෙවැනි තත්ත්වයක් පැවතිය ද දෛනික කාලසටහනට අනුව දුම්රිය ධාවනය කිරීමට උපරිම උත්සාහයක යෙදෙන බවයි ඔහු මාධ්‍ය වෙත අදහස් දක්වමින් අද (23) සඳහන් කළේ.
කෙසේ වෙතත් දෙසැම්බර් 27 වනදා රාත්‍රී බදුල්ල දක්වා විශේෂ දුම්රියකුත්, බදුල්ල සිට කොළඹ කොටුව දක්වා විශේෂ දුම්රියකකුත්, දෙසැම්බර් 28 වනදා උදෑසන බදුල්ල දක්වා විශේෂ දුම්රියකුත් ධාවනයට එක්කර ඇති බව ඔහු පැවසුවා.
එමෙන්ම 29 වනි දින රාත්‍රී බදුල්ල සිට කොළඹ කොටුව දක්වා විශේෂ දුම්රියක් සහ උදෑසන බදුල්ලේ සිට කොළඹ කොටුව දක්වා දුම්රියක් ද ධාවනය කිරීමට කටයුතු කර ඇති බවයි වාර්තා වන්නේ.
ඊට අමතරව සති අන්තය පමණක් ධාවනය වූ කොළඹ කොටුව සිට යාපනය දක්වා ධාවනය වූ නගරාන්තර සීඝ්‍රගාමී දුම්රිය සතියේ දින හතේම ධාවනයට එක් කිරීමට කටයුතු කර ඇති බව ද දුම්රිය නියෝජ්‍ය සාමාන්‍ය අධිකාරිවරයා පැවසුවා.
එමෙන්ම යාල් දේවි සීඝ්‍රාමී දුම්රියට අමතර මැදිරි එක්කර මැදිරි සංඛ්‍යාව වැඩිකර ධාවනය කිරීමට කටයුතු යොදා ඇති බව ද ඔහු සඳහන් කර සිටියා.
