හිටපු ජනාධිපතිවරුන් සහ ඔවුන්ගේ බිරින්දෑවරුන්ගේ ආරක්ෂාව වෙනුවෙන් ගත වූ මාස 11ක කාලය තුළ රුපියල් මිලියන 1,448ක් වියදම් කර ඇති බව මහජන ආරක්ෂක අමාත්‍ය ආනන්ද විජේපාල පැවසුවා.
අද (17) පාර්ලිමේන්තුවේ දී විශේෂ ප්‍රකාශයක් කරමින් අමාත්‍යවරයා මේ බව සඳහන් කළා.
ඒ, අනුව ගත වූ මාස 11 හිටපු ජනාධිපති මහින්ද රාජපක්ෂ වෙනුවෙන් රුපියල් මිලියන 710ක පිරිවැයක් දැරීමට සිදුව ඇති බවයි ඔහු අමාත්‍යවරයා පැවසුවේ.
එමෙන්ම මෛත්‍රීපාල සිරිසේන හිටපු ජනාධිපතිවරයා වෙනුවෙන් මිලියන 207ක වැය බරක් ද දැරීමට සිදුව ඇති බවට අනාවරණය කළා.
ඊට අමතරව පසුගිය මාස 11 තුළ හිටපු ජනාධිපති ගෝඨාභය රාජපක්ෂ වෙනුවෙන් රුපියල් මිලියන 307ක වැය බරක් දැරීමට සිදුව ඇති බවයි අමාත්‍යවරයා වැඩිදුරටත් අනාවරණය කළේ.
හිටපු ජනාධිපති රනිල් වික්‍රමසිංහ වෙනුවෙන් රුපියල් මිලියන 82ක වැය බරක් දරා ඇති බවත්, හිටපු ජනාධිපතිනී චන්ද්‍රිකා බණ්ඩාරනායක කුමාරණතුංග වෙනුවෙන් මිලියන 112ක වියදමක් දැරීමට සිදුව ඇති බව ද මහජන ආරක්ෂක අමාත්‍යවරයා සඳහන් කර සිටියා.
හිටපු ජනාධිපති රණසිංහ ප්‍රේමදාසගේ බිරිඳ වෙනුවෙන් මිලියන 32ක මුදලක් මෙම කාලය තුළ ආරක්ෂාව සඳහා දරා ඇති බවයි අමාත්‍යවරයා අද පාර්ලිමේන්තුවට අනාවරණය කළේ.
මේ අතර හිටපු ජනාධිපතිවරුන් වෙනුවෙන් යොදවා ඇති ත්‍රිවිධ හමුදා ආරක්ෂාව ලබන සතියේ සිට ඉවත් කරන බව ද අමාත්‍යවරයා අද පාර්ලිමේන්තුවේ දී දැනුම් දුන්නා.
ඒ, අනුව හිටපු ජනපතිවරුන් සඳහා පොලිස් ආරක්ෂාව පමණක් ක්‍රියාත්මක බවයි ඔහු සඳහන් කළේ.
ශ්‍රී ලංකා පොලිසිය මඟින් සිදුකළ තක්සේරුව පදනම් කරගෙන රජය මෙම තීරණයට එළඹ තිබෙනවා.
