බැඳුම්කර නඩුවෙන් කබ්රාල්ලා නිදහස් කරන්න – කොළඹ මහාධිකරණයට ඉල්ලීමක්

2011 වසරේ සිදුවූ ග්‍රීක බැඳුම්කර ගනුවෙනුව මහා බැංකුවේ රෙගුලාසිවලට හා මුල්‍ය මණ්ඩලයේ රෙගුලාසිවලට සිදුව ඇති බවට ශ්‍රේෂ්ඨාධිකරණය විසින් නියෝගයක් නිකුත්කර තිබිය දීත් වසර 10කට පසුව හිටපු මහ බැංකු අධිපති අජිත් නිවාඩ් කබ්රාල් ඇතුළු විත්තිකරුවන් පිරිසකට එරෙහිව අල්ලස් හෝ දූෂණ විමර්ශන කොමිෂන් සභාව එම සිද්ධිය සම්බන්ධයෙන් නැවත නඩු පවරා ඇතැයි විත්තියේ නීතිඥවරුන් අද (06) කොළඹ මහාධිකරණයට පේනවා දුන්නා.

රටේ ඉහළම අධිකරණය විසින් එවැනි නියෝගයක් ලබාදී තිබිය දීත් එකම සිද්ධිය සම්බන්ධයෙන් පැවරූ නඩුවක් විභාග කිරීම‍ට නෛතික බලයක් පහළ අධිකරණයට නොහැකි බව ද මහාධිකරණයට පේනවා දුන් නීතිඥවරුන් සිය සේවාදායකින් චෝදනාවලින් නිදහස් කරන ලෙස ද විනිසුරුවරයාගෙන් ඉල්ලා සිටියා.

ග්‍රීසිය දැඩි ආර්ථික අර්බුදයකට මුහුණ දී තිබියදීත් දැන දැනම ග්‍රීක රජය විසින් නිකුත් කරන ලද භාණ්ඩාගාර බිල්පත් මිලදී ගැනීමෙන් රජයට රුපියල් කෝටි 184කට අධික මුදලක් පාඩු කළේ යැයි චෝදනා කරමින් අල්ලස් හෝ දූෂණ විමර්ශන කොමිෂන් සභාව විසින් පවරා ඇති නඩුව අද (06) කැඳවූ අවස්ථාවේ දී මෙම ඉල්ලීම සිදු කළා.