හිටපු අමාත්‍ය මහින්දානන්ද අලුත්ගමගේ මහතා දිවයිනෙන් පිටත්ව යාමට සූදානමින් සිටින බවට තොරතුරු වාර්තා වී තිබෙනවා.
අභ්‍යන්තර ආරංචි මාර්ග තහවුරු කළේ; කටුනායක ගුවන්තොටුපොළින් අද (16) පස්වරුවේ හිටපු අමාත්‍යවරයා පිටත්ව යාමට පිඹුරුපත් සකසා ඇති බවයි.
ඒ අනුව හිටපු අමාත්‍යවරයා යළි ශ්‍රී ලංකාවට නොපැමිණෙනු ඇති බවට ද එම ආරංචි මාර්ග සඳහන් කරනවා.
මේ පිළිබඳව නිල වශයෙන් තහවුරු කරගැනීමට දසත ප්‍රවෘත්ති අංශය හිටපු අමාත්‍යවරයාගේ දුරකථනයට ඇමතුම් ගත්ත ද ඔහු දුරකථනය විසන්ධි කර තිබුණා.
අද පෙරවරුවේ හිටපු අමාත්‍යවරයා තමන් දේශපාලනයෙන් සමු ගන්නා බවට මාධ්‍ය සාකච්ඡාවක් පවත්වමින් පැවසුවා.
නාවලපිටිය මහින්දානන්ද අලුත්ගමගේ පදනම් කාර්යාලයේ මාධ්‍ය හමුවක් පවත්වමිනුයි හිටපු අමාත්‍යවරයා මේ බව සඳහන් කළේ.
මෙවර මහ මැතිවරණයේ දී නාවලපිටිය දිස්ත්‍රික්කය නියෝජනය කරමින් තරග කළ හිටපු අමාත්‍යවරයාට සිය ආසනය අහිමි වුණේ ජාතික ජන බලවේගය හමුවේ දැවැන්ත පරාජයක් ද විඳ දරාගැනීමට සිදු කරමින්.
දශක හතක කාලයක් අලුත්ගමගේ පරම්පරාව නාවලපිටිය ආසනයේ ක්‍රියාකාරි දේශපාලනයේ නිරත වු බවත්, ඉන් දශක තුනක් තමන් දේශපාලනයේ නිරත වු බවත්, මහනුවර දිස්ත්‍රික්කයේ ජනතාවට තමන්ගේ සේවය අවශ්‍ය නොවන බවට මෙවර පැවති මහ මැතිවරණයෙන් පෙන්නුම් කර ඇති නිසා තමන් දේශපාලනයෙන් සමු ගැනීමට තීරණය කළ බව ද හෙතෙම ප්‍රකාශ කළා.
මෙවර පැවති මහ මැතිවරණයෙන් නව ප්‍රජාතන්ත්‍රවාදි පෙරමුණෙන් ගෑස් සිලින්ඩරයෙන් මහනුවර දිස්ත්‍රික්කය වෙනුවෙන් තරග කළ මහින්දානන්ද මහතා හට හිමිවුණේ ඡන්ද 20401ක් පමණයි.
එවන් පසුබිමක දීයි හිටපු අමාත්‍යවරයා මෙලෙස දිවයිනෙන් පිටත්ව යාමට සැලසුම් සකස් කර ඇති බවට වාර්තා වන්නේ.
wpDiscuz
