සුප්‍රසිද්ධ දකුණු කොරියානු නළුවෙකු ජීවිතක්ෂයට පත්වෙයි

තරුණියන්ගේ සිත් ඇද බැඳ ගත් දකුණු කොරියානු තරුණ නළු සොන් ජේ – ලීම් ජීවිතක්ෂයට පත් ව තිබෙනවා.

CNN පුවත් සේවය වාර්තා කළේ 39 හැවිරිදි සොන් ජේ – ලීම් සෝල් හි දී ජීවිතක්ෂයට පත් ව සිටියදී සොයාගත් බවයි.

සොන් ජේ – ලීම් අතිශය ජනප්‍රිය වූයේ මෝස්තර නිරූපණ ශිල්පියෙකු සේම දකුණු කොරියානු නාට්‍යය හරහා වන බව ප්‍රසිද්ධ කරුණක්.

සොන් ජේ – ලීම් සිය මිතුරෙකු සමග පෙරේදා (12) දින දිවා ආහාරය ගැනීමට සැලසුම් කර තිබූ බවත්; එම මිත්‍රයා ඔහුගේ මහල් නිවාසය වෙත ගමන් කළ අවස්ථාවේ දී නිවසෙහි තිබූ සොන්ගේ සිරුර හමුව ඇති බවයි වාර්තා වනවා.

කෙසේවෙතත් මෙය ස්වාභාවික මරණයක් ද නැතහොත් ඝාතනයක් දැයි මෙතෙක් හෙළි ව නැති බවත් සිරුර වැටී තිබූ ස්ථානයේ හෝ කිසිදු ලේ සලකුණක් හෝ දක්නට නොලැබුණු බවත් පැවසෙනවා.

CNN කළ විමසීමක දී සෝල් පොලිසිය පවසා ඇත්තේ වැඩිදුරටත් මෙසේයි.

“අපගේ මූලික විමර්ශනය මෙතෙක් අපරාධ ක්‍රියාකාරකම්වල කිසිදු සලකුණක් හෙළි කර නැහැ” යනුවෙන්.

සිද්ධිය සම්බන්ධයෙන් වැඩිදුර පොලිස් විමර්ශන ක්‍රියාත්මකයි.