කැන්ටබරි අගරදගුරු ධුරයෙන් ජස්ටින් වෙල්බි ඉල්ලා අස්වී තිබෙනවා.
ළමා අපචාරකයෙකු වන ජෝන් ස්මිත් නැමැත්තා සම්බන්ධයෙන් නියමිත කාලයේ දී කරුණු වාර්තා නොකිරීම සම්බන්ධයෙන් නැගී ආ විරෝධය සහ පීඩනය හමුවේ ඔහු මෙලෙස අගරදගුරු ධූරයෙන් ඉල්ලා අස් වී ඇති බවයි වාර්තා වන්නේ.
එංගලන්ත පල්ලියේ ජ්‍යෙෂ්ඨතම බිෂොප්වරයා වූ ජස්ටින් වෙල්බි වසර 11ක පමණ කාලයක් එම ධුරයේ කටයුතු කරණු ලැබුවා.
ජෝන් ස්මිත් නැමැති ළමා අපයෝජකයා සම්බන්ධ තොරතුරු ජස්ටින් වෙල්බි වෙත ලැබී තිබියදීත් 2018 වසරේ ජෝන් ස්මිත් මිය යන තෙක්ම එම අපරාධ තොරතුරු වසන් කරගෙන සිටි බවයි ජස්ටින් වෙල්බි අගරදගුරුවරයාට වාර්තාවක් මඟින් චෝදනා එල්ල වී ඇත්තේ.
1970 සහ 1980 ගණන්වල එක්සත් රාජධානියේ ක්‍රිස්තියානි කඳවුරුවල දී ජෝන් ස්මිත්ට මුණගැසුණු පිරිමි ළමයින් සීයකට වැඩි සංඛ්‍යාවක් අපයෝජනයට ලක්කර ඇති බව ඔහුට චෝදනා එල්ල වී තිබුණා.
ක්‍රිස්තියානි පුණ්‍යායතනයක බැරිස්ටර් සහ ජ්‍යෙෂ්ඨ සාමාජිකයා වූ ජෝන් ස්මිත්ට පසුව සිම්බාබ්ව සහ දකුණු අප්‍රිකාවට සංක්‍රමණය වූ අතර, එහිදී ඔහු වයස අවුරුදු 13 සිට 17 දක්වා පිරිමි ළමයින් විශාල සංඛාවක් අපයෝජනයට ලක් කළ බව වාර්තාව මගින් අනාවරණය කර තිබෙනවා.
2013 වසරේ දී එම පල්ලියේ ඉහළම රැකියාව භාරගත් ජස්ටින් වෙල්බි ඇතුළු එංගලන්ත පල්ලිය, ස්මිත්ගේ අපයෝජනය පිළිබඳව කරුණු දැන සිටි බවයි අදාළ වාර්තාව මගින් අනාවරණය කර ඇත්තේ.
ජස්ටින් වෙල්බි සහ පල්ලියේ අනෙකුත් බලධාරීන් විසින් මෙම අපරාධ සම්බන්ධයෙන් එක්සත් රාජධානියේ පොලිසියට සහ දකුණු අප්‍රිකාවේ බලධාරීන්ට වාර්තා කළේ නම්, ජෝන් ස්මිත් මිය යාමට පෙර නීතිය ඉදිරියට ගෙන ඒමට ඉඩ තිබූ බව එම වාර්තාවේ සඳහන්ව ඇත්තේ.
මේ සම්බන්ධයෙන් ජස්ටින් වෙල්බිට එල්ල වූ පීඩනය මධ්‍යයේ ඔහු ඊයේ (12) කැන්ටබරි අගරදගුරු ධුරයෙන් මෙලෙස ඉල්ලා අස් වී තිබෙනවා.
ජෝන් ස්මිත් නැමැත්තා 2018 අගෝස්තු මාසයේ දී දකුණු අප්‍රිකාවේ කේප් ටවුන් හිදී මියගොස් තිබුණා.
