එක්සත් ජනපද ජනාධිපති ලෙස තේරී පත් වූ ඩොනල්ඩ් ට්‍රම්ප්ගේ නව ජාතික ආරක්ෂක උපදේශක ලෙස ෆ්ලොරිඩාවේ කොන්ග්‍රස් සභික මයික් වෝල්ට්ස් පත්කර ඇති බවයි වාර්තා වන්නේ.
මේ වනවිට 50 හැවිරිදි වියේ පසුවන වෝල්ට්ස්, විශ්‍රාමික හමුදා කර්නල්වරයෙක් වන අතර, ඔහු එක්සත් ජනපද හමුදාවේ ප්‍රභූ විශේෂ බලකායේ ද සේවය කර තිබෙනවා.
මයික් වෝල්ට්ස් 2019 සිට එක්සත් ජනපද නියෝජිත මන්ත්‍රී මණ්ඩලයේ සාමාජිකයෙක් ලෙස කටයුතු කරන අයෙක්.
ඔහු ජනාධිපති ජෝ බයිඩන්ගේ විදේශ ප්‍රතිපත්තිය දැඩි ලෙස විවේචනය කරන අයෙකු වී සිටිනවා.
මයික් වෝල්ට්ස් පරිපාලනයේ සේවය කිරීමට කැමැත්තෙන් සිටි අයෙක් වන අතර, පෙන්ටගනයට නායකත්වය දීමට අපේක්ෂකයෙකු ලෙස ද ඔහු සැලකෙනවා.
මේ අතර එක්සත් ජනපද ජනාධිපති ලෙස තේරී පත් වූ ට්‍රම්ප්; ෆ්ලොරිඩා සෙනෙට් සභික මාර්කෝ රුබියෝ රාජ්‍ය ලේකම් ලෙස නම් කරනු ඇතැයි අපේක්ෂා කරන බව නිව් යෝර්ක් ටයිම්ස් පුවත් සේවය වාර්තා කරනවා.
කෙසේ වෙතත් 2016 දී ඔවුන් රිපබ්ලිකන් ජනාධිපති අපේක්ෂකත්වය සඳහා තරඟ කරන අවස්ථාවේ දී රුබියෝ, ට්‍රම්ප්ව හැඳින්වූයේ ජනාධිපතිකම අපේක්ෂා කළ වඩාත්ම අශිෂ්ට පුද්ගලයා ලෙසයි.
