පවතින රජය මුදල් මුද්‍රණය කිරීමක් සිදු කළා යැයි තමන් නොසිතන බව හිටපු පාර්ලිමේන්තු මන්ත්‍රී ආචාර්‍ය සුසිල් ප්‍රේම්ජයන්ත මහතා පවසනවා.
අද (30) පැවති මාධ්‍ය හමුවක දී හිටපු මන්ත්‍රීවරයා කියා සිටියේ ‘රජය මුදල් අලුතින් අච්චු ගැසුවා’ යැයි පැතිරෙන කතා අවබෝධයකින් තොරව සිදු කරන ඒවා බවයි.
මුදල් මුද්‍රණයකට නොයා රජය පෙර රජයෙන් සම්මත කරන ලද අණ පනත් ප්‍රකාරව ගමන් කරන බවත්; නව මුදල් මුද්‍රණය කිරීමකට යාමට ශ්‍රී ලංකා මහ බැංකුවෙන් අවසරයක් නොලැබෙන බව ද හිටපු මන්ත්‍රීවරයා ප්‍රකාශ කළා.
මේ වන විට මහ බැංකුව යනු ස්වාධීන ආයතනයක් මිසෙක පසුගිය කාලය පුරාවටම මුදල් මුද්‍රණය කිරීම් හේතුවෙන් රට තුළ උද්ධමනය ඉහළ ගිය බවයි සුසිල් ප්‍රේම්ජයන්ත් මහතා ප්‍රකාශ කළේ.
නව ආණ්ඩුවක් පත්ව අයවැයක් ඉදිරිපත් කරන තෙක් රජය සිදු කරනුයේ ණය ගැනීමට හැකි සීමාව තුළ කෙටි කාලීන වශයෙන් භාණ්ඩාගාර බිල්පත් නිකුත් කරමින් රටේ පැවැත්මට අවශ්‍ය මුදල් සපයා ගන්නා බව ද හිටපු මන්ත්‍රීවරයා පෙන්වා දුන්නා.
අයවැයක් සම්මත නොකර; මුදල් මුද්‍රණය කිරීමට නොහැකි බවත් රජය ගමන් කරන්නේ අතුරු සම්මත ගිණුමෙන් පමණක් බව ද හෙතෙම වැඩිදුරටත් සඳහන් කළා.
භාණ්ඩාගර බිල්පත් වෙන්දේසි කිරීමෙන් පොළී අනුපාතය ඉහළ යන බවත්; කුඩා ව්‍යාපාරික සමාගම්වලට සිය ව්‍යාපාරික අර්බුද ඇති වන බවත්; ජනතාව අතර මුදල් සංසරණය වීම හැකිළෙන බවත් මෙම මාධ්‍ය හමුවේ දී හෙතෙම කියා සිටියා.
