පක්ෂයට විශාල වශයෙන් ජාතික තලයේ සහායක් ලබා දුන්න ද; රත්නපුර දිස්ත්‍රික්කයට පිටින් අපේක්ෂකයින් ආනයනය නොකිරීමට තීරණය කළ බව සමගි ජන බලවේගය දිස්ත්‍රික් නායක හිටපු පාර්ලිමේන්තු මන්ත්‍රී හේෂා විතානගේ මහතා පවසනවා.
අද (11) දහවල් රත්නපුර දිස්ත්‍රික්කයේ මෙවර මහමැතිවරණයට අදාළ නාමයෝජන ලැයිස්තුව භාරදීමෙන් අනතුරුව මාධ්‍යවේදීන් විමසා සිටියේ ප්‍රවීණ රංගන ශිල්පිනී දමිතා අබේරත්න මහත්මියගේ නම ලැයිස්තුවෙන් ඉවත් කිරීමට හේතු කවරේ ද යන්නයි.
දමිතා අබේරත්න මහත්මිය යනු සමගි ජන බලවේගය පක්ෂයට දැවැන්ත මෙහෙවරක් දේශපාලනික වශයෙන් සිදු කළ අයෙක් බවත්; ඇය දක්ෂ කලාකාරිණියක් බවත්; රත්නපුර දිස්ත්‍රික්කයටම අනන්‍ය වූ කාන්තා නායිකාවකගේ අවශ්‍යතාව ඇති හෙයින් එම තීන්දුව ගත් බව හිටපු පාර්ලිමේන්තු මන්ත්‍රීවරයා සඳහ කළා.
මන්ත්‍රීවරයා වැඩිදුරටත් සඳහන් කළේ; දේශපාලන නායිකාවක් හදාගැනීමේ අවශ්‍යතාව මත කිසිදු ලෙසකින් දිස්ත්‍රික්කය තුළ නො ඉපදුණු අපේක්ෂකයින් තෝරා නොගැනීමට ගත් තීන්දුවක් මෙම සිද්ධියට මුල් වූ බවයි.
