නවසීලන්තයේ ටෙස්ට් ක්‍රිකට් නායකයා වශයෙන් කටයුතු කළ වේග පන්දු ක්‍රීඩක ටිම් සවුති සිය නායකත්වයෙන් ඉල්ලා අස්වී තිබෙනවා.
එරට ක්‍රිකට් ආරංචි මාර්ග පැවසුවේ; පසුගියදා නිමාවට පත් වූ ශ්‍රී ලංකාවට එරෙහිව පැවති තරග 02කින් සමන්විත ටෙස්ට් තරගාවලියෙන් ලද පරාජයත් සමග සවුති මෙම තීරණයට එළඹ ඇති බවයි.
එබැවින් ඉදිරියේ දී ඉන්දියාවට එරෙහිව පැවැත්වීමට නියමිත ටෙස්ට් තරගාවලිය සඳහා නවසීලන්තයේ නායකත්වයට ටොම් ලැතම් පත් කෙරෙනු ඇති බවටත් වාර්තා වනවා.
කණ්ඩායමේ ජයග්‍රහණය සහ ඉදිරි අනාගතයේ යහපත තකා තමන් මෙම තීරණය ගෙන ඇති බවයි ටිම් සවුති නවසීලන්ත ක්‍රිකට් පාලක මණ්ඩලයට යොමු කළ ලිපියෙහි ඇත්තේ.
2022 වර්ෂයේ දී කේන් විලියම්සන් සිය නායකත්වයෙන් ඉල්ලා අස්වීමෙන් පසුව ටිම් සවුති නායකත්වයට පත් වූ අතර ඔහු විසින් ටෙස්ට් තරග 14කට සිය නායකත්වය සපයා තිබෙනවා.
එහිදී ජයග්‍රහණ 06ක්, තරග 02ක් ජය පරාජයෙන් තොරවීම ද දැකිය හැකියි.
