හමාස් සංවිධානයේ ගාසා හි ප්‍රධානියා ඇත්තටම මිය ගියා දැයි සැකයක්

හමාස් සංවිධානයේ ගාසා තීරයේ නායකත්වය ගෙන කටයුතු කළ යාහියා සින්වාර් (Yahya Sinwar) අතුරුදන් ව තිබෙනවා.

විදෙස් මාධ්‍ය වාර්තා කර ඇත්තේ ඔහු ඊශ්‍රායලය එල්ල කළ ප්‍රහාරයකින් මියගොස් ඇතැයි සැක පළ කරන බවටයි.

මෙම අතුරුදන් වූ නායකයා සොයා ඊශ්‍රායලය ද විශේෂ මෙහෙයුමක් ආරම්භ කර ඇති බවට තොරතුරු වාර්තා වනවා.

නායක යාහියා සින්වාර් දිගු කලෙක සිට ප්‍රතිවාදීන්ගෙන් සැඟව සිටි බවටයි පැවසෙන්නේ.

ඊශ්‍රායලයේ ප්‍රසිද්ධ මාධ්‍ය විකාශකයෙකු වන Kan, Haaretz, Maariv සහ Walla වැනි ප්‍රවෘත්ති ආයතන සහ IDF හමුදා බුද්ධි අධ්‍යක්ෂ මණ්ඩලය විසින් ප්‍රකාශ කරනු ලැබ ඇත්තේ ඊශ්‍රායලය මෑතකදී ගාසා වෙත එල්ල කළ දරුණු ප්‍රහාරවලින් සින්වාර් මිය යෑමේ ඉඩකඩ වැඩි බවයි.

නමුත් ඔහු තවමත් ජීවතුන් අතර සිටින බවට ෂින් බෙට් ඒජන්සිය විශ්වාස කරන බව ද එක් පාර්ශ්වයකින් වාර්තා වනවා.

ද ටයිම්ස් ඔෆ් ඊශ්‍රායලයට අනුව, හමාස්ගේ ඔක්තෝබර් 7 ප්‍රහාරයෙන් පසුව ගාසා තීරයේ උමං මාර්ගවල සැඟවී සිටින හමාස් ප්‍රධානියා සටන් විරාම සාකච්ඡාවලට අදාළ පණිවිඩ යැවීම නතර කර ඇති බව ද වාර්තා වනවා.

මේ හේතුවෙන් හෙතෙම මිය යන්නට ඇතැයි විදෙස් මාධ්‍ය සැක පළ කරනවා.

මූලාශ්‍ර උපුටා දක්වමින් Haaretz වාර්තා කළේ, සින්වාර් සැඟවී සිටින බවට සිතන ප්‍රදේශවල උමං මාර්ගවලට ඊශ්‍රායලය බෝම්බ හෙලූ නමුත් ඔහුට හානියක් හෝ මරණයක් සිදු වූ බවට නිශ්චිත සාක්ෂියක් නොමැති බවයි.