සංචාරක නවසීලන්තය සමඟ පැවති පළමු ටෙස්ට් තරගය ජයගැනීමට ශ්‍රී ලංකා කණ්ඩායම අද (23) පෙරවරුවේ සමත් වුණා.
ගාලු ජාත්‍යන්තර ක්‍රීඩාංගණයේ දී පැවති මෙම තරගය ශ්‍රී ලංකා කණ්ඩායම ජයගත්තේ ලකුණු 63කින්.
තරගයේ පස්වන සහ අවසන් දිනය වූ අද දිනයේ තරගය ජයගැනීමට නවසීලන්තයට ලකුණු 68ක් අවශ්‍යව තිබුණා.
ශ්‍රී ලංකා කණ්ඩායමට තරග ජයගැනීම වෙනුවෙන් නවසීලන්ත දෙවන ඉනිමේ කඩුලු 02ක් දවාගැනීමට තිබූ අතර, එම කඩුලු 02ක දවාගැනීමට අද දිනයේ ක්‍රියාත්මක වූ දඟපන්දු යවන ක්‍රීඩක ප්‍රභාත් ජයසූරියට හැකියාව ලැබුනා.
මෙම තරගයේ පළමුව පන්දුවට පහර දුන් ශ්‍රී ලංකාව සිය පළමු ඉනිම සඳහා ලකුණු 305ක ලකුණු පුවරුවක් නිර්මාණය කළ අතර, ඊට පිළිතුරු ලෙස නවසීලන්තය පළමු ඉනිම සඳහා සියලන් දැවී ලකුණු 340ක් රැස් කළා.
අනතුරුව නවසීලන්තය පළමු ඉනිමට වඩා ලකුණු 35ක් පසුපසින් සිටිමින් දෙවන ඉනිම ඇරඹු ශ්‍රී ලංකාව ලකුණු 309ක් රැස් කළේ ජයග්‍රහණය වෙනුවෙන් නවසීලන්තය ලකුණු 275ක ඉලක්කයක් ලබා දෙමින්.
එම ඉලක්කය හඹා ගිය නවසීලන්ත දෙවන ඉනිම ලකුණු 211කට සීමා කරන්නට ශ්‍රී ලංකා පන්දු යවන්නන්ට හැකියාව ලැබුණා.
ඒ, අනුව මෙම තරගය ලකුණු 63 කින් ජයගැනීම ශ්‍රී ලංකාව සමත් වුණේ තරග දෙකකින් සමන්විත ටෙස්ට් තරගාවලිය තරග එකට බිංදුවක් ලෙස පෙරමුණ ගනිමින්.
