2024 ජනාධිපතිවරණයට අදාළ ඡන්ද විමසීමේ කටයුතු අද (21) පස්වරු 4.00ට අවසන් වුණා.
දිවයින පුරා පිහිටි ඡන්ද මධ්‍යස්ථාන 13,421ක දී ජනාධිපතිවරණ ඡන්ද විමසීම අද පෙරවරු 7.00ට ආරම්භ වූ අතර, ඡන්දය ප්‍රකාශ කිරීම සඳහා මහජනතාව අතර දැඩි උනන්දුවක් පැවති බවයි දසත ප්‍රාදේශීය වාර්තාකරුවන් සඳහන් කළේ.
මේ වනවිටත් ඡන්ද මධස්ථානවල ඇති ඡන්ද පෙට්ටි සහ තැපැල් ඡන්ද පෙට්ටි අදාළ ගණන් කිරීමේ මධ්‍යස්ථාන වෙත ප්‍රවාහනය කිරීමේ කටයුතු අරඹා ඇති බවටයි තොරතුරු වාර්තා වුණේ.
දිවයිනේ සියලුම ඡන්ද ගණන්කිරීමේ මධ්‍යස්ථානවල ඡන්දය ගණන්කිරීමේ කටයුතු පස්වරු 8.00ත් 9.00ත් අතර කාලයේ දී ආරම්භ කිරීමට හැකිවනු ඇති බව මැතිවරණ කොමසාරිස් ජනරාල් සමන් ශ්‍රී රත්නායක මාධ්‍ය වෙත අදහස් දක්වමින් සඳහන් කළා.
අද (21) පැවති ඡන්ද විමසීමේ පළමු ඡන්ද ප්‍රතිඵල මධ්‍යම රාත්‍රී 12.00ට පෙර නිකුත් කිරීමට හැකිවනු ඇතැයි කොමසාරිස් ජනරාල්වරයා වැඩිදුරටත් පැවසුවා.
මේ අතර මැතිවරණ නිරීක්ෂකයින් සඳහන් කළේ සමස්ථයක් ලෙස ඡන්දය ප්‍රකාශ කිරීමේ කටයුතු සාමකාමීව පැවැත්වුණු බවයි.
