තලවකැලේ පොලිස් වසමට අයත් මඩකුඹුරවත්තේ ගසක නැග අතු කැපීමට ගිය පුද්ගලයෙකුට ගස මත සිටියදී එල්ල වු බඹර ප්‍රහාරයකින් ගසේන් පහළට ඇද වැටී ජීවිතක්ෂයට පත් ව ඇති බව තලවකැලේ පොලිසිය පවසනවා.
මෙම සිදුවීම අද (20) පෙරවරුවේ සිදුව ඇති අතර ජීවිතක්ෂයට පත්ව ඇත්තේ 31 හැවිරිදි එක් දරු පියෙක්.
මරණකරු තවත් පුද්ගලයෙකු සමග ගාන්ඩිස් වර්ගයේ ගසක අතු කැපීමට ගොස් ඇති අතර එහි අතු කපමින් සිටින අවස්ථාවේ මෙම අවාසනාවන්ත ඉරණමට ගොදුරු වී තිබුණා.
ගස පාමුල සිටි පුද්ගලයාද බඹර ප්‍රහාරයෙන් තුවාල ලබා ඇති බවයි වාර්තා වන්නේ.
බඹරුන් පහරදෙන අවස්ථාවේ ගස මත සිටි පුද්ගලයා බියට පත් වී ගසෙන් පහළට ඇද වැටෙන්නට ඇති බවයි සිද්ධිය සම්බන්ධයෙන් පරීක්ෂණ කරන තලවකැලේ පොලිසිය සඳහන් කරන්නේ.
බඹර ප්‍රහාරයෙන් තුවාල ලැබූ අනෙක් පුද්ගලයා ලිදුල ප්‍රාදේශීය රෝහල වෙත ඇතුලත් කර ඇති අතර, ගසෙන් වැටී ජිවිතක්ෂයට පත් පුද්ගලයාගේ සිරුර පශ්චාත් මරණ පරීක්ෂණ සඳහා නුවරඑළිය දිස්ත්‍රික් මහා රෝහලේ අධිකරණ වෛද්‍යවරයා වෙත යොමු කරන බව තලවකැලේ පොලිසිය පවසනවා.
