බීමතින් රිය ධාවන කර මුදල් රාජ්‍ය අමාත්‍ය ෂෙහාන් සේමසිංහගේ නිල රථය අනතුරට ලක්කර බව කියන සහකාර පොලිස් අධිකාරීවරයා රුපියල් ලක්ෂ 05ක ශරීර ඇපමත මුදාහැර තිබෙනවා.
ඒ, සැකකාර පොලිස් අධිකාරීවරයා පුත්තලම වැඩ බලන මහේස්ත්‍රාත්වරයා හමුවට ඊයේ (15) දින ඉදිරිපත් කිරීමෙන් අනතුරුවයි.
පසුගිය 14 වනදා රාත්‍රියේ පුත්තලම කොට්ඨාසයේ රථ වාහන අංශය භාර සහකාර පොලිස් අධිකාරීවරයා පුත්තලම – හලාවත මාර්ගයේ පාලාවිය ප්‍රදේශයේ දී මෙම අනතුර සිදුකර ඇති බවයි වාර්තා වුණේ.
මුදල් රාජ්‍ය අමාත්‍ය ශෙහාන් සේමසිංහ තම පවුලේ අය සමඟ නිල රථයෙන් කොළඹ සිට අනුරාධපුරය දක්වා ගමන් කරමින් සිටි ඇති අතර, සහකාර පොලිස් අධිකාරීවරයා තමන්ට අයත් නිල රථයෙන් කොළඹ දෙස සිට පුත්තලම දෙසට ගමන් කරමින් සිටිය දී මෙම අනතුර සිදුව තිබෙනවා.
අධික ලෙස බීමතින් සිට ඇති සහකාර පොලිස් අධිකාරීවරයා අනතුරින් පසු කලහකාරී ලෙස හැසිරෙමින් රාජ්‍ය ඇමතිවරයාගේ ආරක්ෂක නිලධාරියා සහ රියදුරා සමඟ ආරවුලක් ඇති කර ගෙන ඇති බවට ද තොරතුරු වාර්තා වනවා.
අනතුරුව පුත්තලම පොලීසය විසින් අත්අඩංගුවට ගැනුණු සහකාර පොලිස් අධිකාරීවරයා ඊයේ (15) පුත්තලම වැඩ බලන මහේස්ත්‍රාත්වරයා හමුවට ඉදිරිපත් කිරීමෙන් අනතුරුවයි මෙලෙස ඇප නියමකර ඇත්තේ.
wpDiscuz
