නීතිවිරෝධීව මෙරටට සූක්ෂ්ම අයුරින් ගෙනා විදේශීය රටක නිෂ්පාදිත දුම්වැටි තොගයක් සමග ඒවා රට තුළට රහසිගත ව රැගෙන යාමට උත්සාහ කළ මගියෙකු අත් අඩංගුවට ගෙන තිබෙනවා.
අද (11) අලුයම මෙම සැකකරු කටුනායක ගුවන් තොටුපොළ වෙත පැමිණ ඇත්තේ අලුයම 05.25ට ඩුබායි සිට ෆිට්ස් එයාර් ගුවන් සේවයේ 8 ඩී.- 822 දරන ගුවන් යානයෙන් බවයි වාර්තා වන්නේ.
සැකකරු ගෙන ආ විදේශීය දුම් වැටි තොගය වෙළෙඳපොළ වටිනාකමින් රුපියල් පනස් එක් ලක්ෂ හැට දහසක් වටින බව ද හෙළි ව තිබෙනවා.
සැකකරු එම දුම්වැටි ගුවන් තොටුපොළ හරිත මාවත ( Green Channel ) ඔස්සේ ගුවන් තොටුපොළෙන් පිටතට රැගෙන යාමට තැත් කරමින් සිටියදියි රේගු නිලධාරීන් අත් අඩංගුවට ගෙන ඇත්තේ.
මොහු කොළඹ ප්රදේශයේ පදිංචි ගුවන් මගින් සිය ව්යාපාරික කටයුතු සිදු කරන පුද්ගලයෙක් බව ද හෙළි ව තිබෙනවා.
සැකකරු රැගෙන ආ ගමන් මළු තුළ “ප්ලැටිනම්” සහ “මැන්චෙස්ටර්” වර්ගයේ දුම්වැටි 34,400 ක් අඩංගු දුම්වැටි කාටූන් 172 ක් සඟවා ගෙන සිටියදී සොයාගෙන ඇති බවයි වාර්තා වන්නේ.
පසුව කටුනායක ගුවන් තොටුපොළ රේගු අධ්යක්ෂ පද්මිණී කුමාරිහාමි මහත්මිය ඇතුළු රේගු නිලධාරීන් විසින් මේ පිළිබඳ විධිමත් රේගු පරීක්ෂණයක් සිදු කර මෙම දුම්වැටි සියල්ල රාජසන්තක කර, මොහුට රුපියල් ලක්ෂ 02ක දඩ මුදලක් ගෙවන ලෙස ද නියෝග කර තිබෙනවා.
