මොයින් අලී ජාත්‍යන්තර ක්‍රිකට්වලින් සමුගනී

එංගලන්ත තුන් ඉරියව් ක්‍රීඩක මොයින් අලී ජාත්‍යන්තර ක්‍රිකට් පිටියෙන් සමුගන්නා බව ප්‍රකාශ කර තිබෙනවා.

2024 විස්සයි විස්ස ලෝක කුසලාන තරගාවලියේ දී ඉන්දියාවට එරෙහිව ගයනාවේ පැවති අවසන් පූර්ව වටයේ තරගයේ දී මොයින් අලී අවසන් වරට එංගලන්තය නියෝජනය කළා.

“මට වයස අවුරුදු 37 යි, මේ මාසයේ ඕස්ට්‍රේලියානු තරඟාවලිය සඳහා මාව තෝරාගෙන නැහැ,” මොයින් අලී Daily Mail වෙත සම්මුඛ සාකච්ඡාවක දී අදහස් දක්වමින් පවසා තිබෙනවා.

“මම එංගලන්තය වෙනුවෙන් ගොඩක් ක්‍රිකට් ක්‍රීඩා කරලා තියෙනවා. ඊළඟ පරම්පරාවට කාලය ඇවිත්. ඒක මට පැහැදිලියි. වෙලාව හරි කියලා දැනුණා. මම මගේ කොටස කළා.” යනුවෙන් ඔහු වැඩිදුරටත් අදහස් දක්වමින් පැවසුවා.

මොයින් අලී 2014 වසරේ එංගලන්ත කණ්ඩායමේ බටහිර ඉන්දීය කොදෙව් සංචාරයේ දී ජාත්‍යන්තර ක්‍රිකට් දිවියට පිවිසියා.

ඔහුගේ 10 වසරක වෘත්තීය ජීවිතය තුළ රට වෙනුවෙන් එක්දින තරඟ 138ක්, විස්සයි විස්ස තරග 92ක් සහ ටෙස්ට් තරග 68ක් ක්‍රීඩා කර තිබෙනවා.

ඔහු ශතක 08ක් සහ අර්ධ ශතක 28ක් ඇතුළුව ලකුණු 6678ක් ජාත්‍යන්තර ක්‍රිකට් පිටිය තුළ රැස්කර ඇති අතර, එංගලන්තය වෙනුවෙන් ආකෘති තුන පුරා බිඳ දමා තිබෙන කඩුලු සංඛ්‍යාව 366ක්.

මේ අතර මොයින් අලී වැඩිදුරටත් පවසා ඇත්තේ තමා දිගටම ෆ්‍රැන්චයිස් ක්‍රිකට් ක්‍රීඩා කරන බවයි.

පසුව පුහුණුකරුවෙකු ලෙස කටයුතු කිරීමට බලාපොරොත්තුවක් පවතින බව ද ඔහු වැඩිදුරටත් සඳහන් කර තිබෙනවා.