සොබාදනවි පළමු අදියර ජනපති සුරතින් මහජන අයිතියට

සොබාදනවි විදුලි බලාගාරයේ පළමු අදියර ජනාධිපති රනිල් වික්‍රමසිංහ මහතාගේ සුරතින් විවෘත කෙරුණා.

අද (28) පෙරවරුවේ ජනාධිපති, විදුලිබල හා බලශක්ති අමාත්‍ය කංචන විජේසේකර ඇතුළු පිරිසකගේ සහභාගීත්වයෙන් නව විදුලි බලාගාරය විවෘත කරනු ලැබුවා.

ජනාධිපතිවරයා විසින් සොබාදනවි විදුලි බලාගාරය මෙරට විදුලි උත්පාදනයට එක් කළ බවට නිල වශයෙන් සංකේතවත් කරමින් සමරු ඵලකය ද විවෘත කිරීම සිදු කළා.

සොබාදනවි යනු මෙරට ඉදිවන පළමු ස්වාභාවික ද්‍රව වායු බලාගාරය (LLNG) ලෙසයි ඉතිහාසගත වන්නේ.

කෙරවලපිටියේ “සෝබාධනවි” විදුලි බලාගාරයෙන් මෙගාවොට් 350ක් ජාතික විදුලි පද්ධතියට මෙලෙස අද දිනයේ දී එක් කෙරුණා.

අමෙරිකානු ඩොලර් මිලියන 220ක වටිනාකමකින් යුත් ව්‍යාපෘතියක් වන සොබාදනවි බලාගාරයේ මෙහෙයුම් හා නඩත්තු කොන්ත්‍රාත්කරු ලක්දනවි විදුලි බලාගාරය වන අතර සොබාදනවි සමාගම ව්‍යාපෘතියෙහි භාරකරු වනවා.

LTL සමාගම 1996 වසරේ සිට බංග්ලාදේශය, නේපාලය හා මාලදිවයින වැනි රටවල්වල විශාල ප්‍රමාණයේ විදුලි ව්‍යාපෘති සිදු කරන මෙරට සමාගමක් වීම ද මෙහි විශේෂත්වයක්.