කන්කසන්තුරේ වරාය සංවර්ධනය කිරීමට ඉන්දියාව මෙරටට අමෙරිකානු ඩොලර් මිලියන 62කට අධික මූල්‍ය ප්‍රදානයක් සිදු කර තිබෙනවා.
මෙම මූල්‍ය ප්‍රදානය මගින් වසර 30ක කාලයක් ඉන්දියාවේ පාලනාධිකාරිය යටතේ වැඩි කොටසක් තැබෙන බවයි වාර්තා වන්නේ.
මෙය ඉන්දියාව සමග සිදු කෙරුණු ගිවිසුමක ප්‍රතිඵලයක් ලෙස සිදු ව තිබෙන බවත් වරායේ ජ්‍යේෂ්ඨ නිලධාරියෙක් පවසා තිබෙනවා.
මුලදී ඉන්දීය රජය උතුරු වරාය ව්‍යාපෘතිය ක්‍රියාත්මක කිරීම සඳහා ණයක් ලබාදීමට අදහස් කළ අතර; වත්මන් ආර්ථිකයේ තත්ත්වය හේතුවෙන් ශ්‍රී ලංකාවට ව්‍යාපෘති ප්‍රදානය කිරීමට ඉන්දියාව මේ වනවිට වැඩි අවධානයක් යොමු කර ඇති බවයි වාර්තා වන්නේ.
වරාය, නාවික හා ගුවන් සේවා අමාත්‍යාංශයේ ලේකම් කේ.ඩී. එස්. රුවන්චන්ද්‍ර මහතා පැවසුවේ; මූලික යෝජනා අනුව ඉන්දීය ඉදිකිරීම්කරුවෙකු මෙම ව්‍යාපෘතිය ක්‍රියාත්මක කරන බවයි.
රටේ උතුරු පළාතේ පිහිටා ඇති කන්කසන්තුරේ වරාය, KKS වරාය ලෙසයි ප්‍රසිද්ධියක් උසුලන්නේ.
එය ආසන්න වශයෙන් අක්කර 16ක වපසරියකින් යුක්ත වන අතර මෙම වරාය පිහිටා ඇත්තේ ඉන්දියාවේ පොන්ඩිචෙරි හි කරයිකාල් වරායේ සිට නාවික සැතපුම් 56 ක් දුරින්.
