හෘද රෝගවලින් සහ වකුඩගු රෝගවලින් පෙළෙන රෝගීන් හට සිය ඖෂධ කටයුතු සඳහා අවශ්‍ය කරන මූල්‍ය ප්‍රතිපාදන ලබාදීමේ ක්‍රියාවලියේ දී ජනාධිපති අරමුදල යටතේ ද ඊට මුදලක් වෙන් වනවා.
එම මුදල් ප්‍රමාණය සියයට සියයකින් ඉහළ දැමීමටයි රජය තීරණය කර ඇත්තේ.
රජයේ මෙම තීරණය පිළිබඳ ව අදහස් පළ කරමින් මුදල් රාජ්‍ය අමාත්‍ය රංජිත් සියඹලාපිටිය සඳහන් කළේ අදාළ රෝගීන්ගේ අයදුම්පත මුදල් අමාත්‍යාංශය වෙත ලැබී සතියක් තුළ සියලු ම ගෙවීම් කටයුතු සිදු කිරීමට කටයුතු කරන බවයි.
මීට පෙර මෙම රෝගීන් සඳහා 50%ක් ජනාධිපති අරමුදලින් ආවරණය කළ අතර 2022 වර්ෂයේ අගෝස්තු මාසය වන විට මෙම සැත්කම් සඳහා අයදුම්පත් 8,000කට ආසන්න ප්‍රමාණයක් ගොඩගැසී ඇති බව වාර්තා වනවා.
එබැවින් රජයට යොමු වන සියලු ම අයදුම්පත් කෙරෙහි සලකා බලමින් ඊට අවශ්‍ය මූල්‍ය ප්‍රතිපදාන ලබාදීමට කටයුතු කරන බවයි මුදල් රාජ්‍ය අමාත්‍යවරයා කෑගල්ලේ පැවති ජන හමුවක් අමතමින් පැවසුවේ.
ජනාධිපති අරමුදලින් හඳුනාගත් අඩු ආදායම්ලාභී පවුල්වල සිසුන් 116,000කට ශිෂ්‍යාධාර ලබාදීමට වත්මන් රජය කටයුතු කරමින් සිටින බවත් අනාගත පරපුර වෙනුවෙන් කරන මෙම ආයෝජනය රටේ ඉදිරි ගමනට සාධනීය සාධකයක් බවත් ඔහු වැඩිදුරටත් පෙන්වා දුන්නා.
මීට වසර දෙකකට පෙර විවිධ සෞඛ්‍ය හේතූන් මත විශේෂයෙන්; හෘද සැත්කම් සඳහා ආධාර අවශ්‍ය පුද්ගලයින් සඳහා ජනාධිපති අරමුදලින් මුදල් නිදහස් කිරීමට බොහෝ කාලයක් ගත වුව ද ඉදිරියේ දී එම තත්ත්වය වෙනස් වන බවයි රාජ්‍ය අමාත්‍යවරයා දැනුම්දුන්නේ.
