තණමල්විල, කුමාරගම ප්‍රදේශයේ නිවසක පැවති උපන් දින සාදයක් අතර තුර සිදුකළ අනතුරකින් සහ ගැටුමකින් පුද්ගලයන් සිව්දෙනෙකු තුවාල ලබා රෝහල් ගතකර තිබෙනවා.
ඊයේ රාත්‍රියේ සාදය පැවැත්වෙමින් තිබෙන අතර තුර පුද්ගලයෙක් එම නිවසේ ගේට්ටුව ද කඩාගෙන කැබ් රථයක් ධාවනය කර ඇති බවයි වාර්තා වුණේ.
එම අවස්ථාවේ දී සාදයට සහභාගී වී සිටි පුද්ගලයින් තිදෙනෙක් තුවාල ලබා ඇති බවයි වාර්තා වුණේ.
පසුව කැබ් රථය ධාවනය කළ පුද්ගලයාට පිරිසක් විසින් පහර දී තිබෙනවා.
මෙහිදී තුවාල ලැබූ පුද්ගලයින් සිව්දෙනෙකු හම්බන්තොට සහ ඇඹිලිපිටිය යන රෝහල්වලට ඇතුළත් කර ඇති අතර, ඉන් දෙදෙනෙකුගේ තත්ත්වය බරපතළ බවයි රෝහල් ආරංචි මාර්ග සඳහන් කළේ.
සාදය පැවති නිවසේ හිමියන් සමඟ ඇති පුද්ගලික ආරවුලක් හේතුවෙන් මනුෂ්‍ය ඝාතනයක් සිදුකිරීමේ අරමුණින් කැබ් රථයේ රියදුරු මෙම අනතුර සිදුකර ඇති බවට පසුව අනාවරණය වී තිබෙනවා.
අදාළ පුද්ගලයාට එරෙහිව මත්ද්‍රව්‍ය ජාවරම් කිරීම ඇතුළු අපරාධ රැසකට එරෙහිව අධිකරණයේ නඩු විභාග වෙමින් පවතින බවට වාර්තා වනවා.
මෙම සිද්ධිය සම්බන්ධයෙන් තණමල්විල පොලිසිය වැඩිදුර විමර්ශන පවත්වනු ලබනවා.
