ශ්රී ලංකා රේගුවේ ජෛව විවිධත්ව, සංස්කෘතික සහ ජාතික උරුමයන් සුරැකීමේ (BCNP) ශාඛාව පෙරේදා (09) දින කටුනායක, BIA හි පිටත්වීමේ පර්යන්තයේ දී ජෛව කොල්ලකෑමේ උත්සාහයක් ව්යර්ථ කිරීමට සමත් වුණා.
අප ගුවන්තොටුපොළ වාර්තාකරු පැවසුවේ; බුද්ධි තොරතුරු මත ක්රියා කරමින්, BCNP නිලධාරීන් විසින් MU232 යානයෙන් චීනය බලා පිටත්ව යන මගීන් 2 දෙනෙකුගේ ගමන් බෑග තුළ සඟවා තිබූ ශාක නිදර්ශක සැලකිය යුතු ප්රමාණයක් සොයා ගෙන ඇති බවයි.
ජාතික වනෝද්යාන ඇතුළුව රටේ විවිධ ස්ථානවලින් එකතු කරන ලද ආරක්ෂිත ශාක විශේෂ යැයි සැක කරන ශාකවල කොළ, මල්, බීජ සහ අනෙකුත් කොටස් මෙයට ඇතුළත් බවත් වාර්තා වනවා.
මෙම කොටස් අයත් වන්නේ කුමන ශාක විශේෂයට ද යන්න තවමත් නිශ්චය කර නැහැ.
රේගු ආඥාපනත, වනසත්ව හා වෘක්ෂලතා ආරක්ෂක ආඥාපනත සහ වන සංරක්ෂණ පනතේ ප්රතිපාදන යටතේ වැඩිදුර විමර්ශන සඳහා මෙම චීන ජාතිකයින් දෙදෙනා සහ නීතිවිරෝධී භාණ්ඩ තොගය රඳවාගෙන තිබෙනවා.
වනජීවී සංරක්ෂණ දෙපාර්තමේන්තුව සහ වන සංරක්ෂණ දෙපාර්තමේන්තුවේ සහයෝගය ඇතිව මෙම සිද්ධිය සම්බන්ධයෙන් පරීක්ෂණ මේ වන විට (10) ක්රියාත්මකයි.
