මේ වනවිට ඩුබායිහි සැඟව සිටින හංවැල්ලේ පොඩි තිළිණ නැමති මහා පරිමාණ මත්ද්‍රව්‍ය ජාවාරම්කරුගේ මත්ද්‍රව්‍ය ජාලය මෙහෙය වූ ප්‍රධාන සැකකරු හෙරොයින් තොගයක් සමඟ පොලිස් විශේෂ කාර්ය බලකාය විසින් අත්අඩංගුවට ගෙන තිබෙනවා.
මෙලෙස අත්අඩංගුවට ගැනුණු සැකකරු වට්ස්ඇප් තාක්ෂණය ඔස්සේ මෙම මත්ද්‍රව්‍ය ජාවාරම මෙහෙයවා ඇති බවයි අනාවරණය වී ඇත්තේ.
කිරිඳිවැල පොලිස් වසමේ මැද්දේගම හංදිය අසල දී විශේෂ කාර්ය බලකාය නිලධාරීන් විසින් සිදුකළ වැටලීමක දී මෙම සැකකරු අත්අඩංගුවට ගැනීමට හැකිව තිබෙනවා.
සැකකරු සන්තකයේ තිබී හෙරොයින් මත්ද්‍රව්‍ය ග්‍රෑම් 08යි මිලි ග්‍රෑම් 980ක් ද සොයාගෙන ඇති අතර, මොහු කිරිඳිවැල ප්‍රදේශයේ පදිංචි වයස අවුරුදු 29ක පුද්ගලයෙක්.
හංවැල්ලේ පොඩි තිළිණ සහ ඔහුගේ අනියම් බිරිඳ වන නේත්‍රා නැමැති කාන්තාව විසින් මෙරට මත්ද්‍රව්‍ය ජාවාරම මෙහෙයවා ඇති අතර, ඔවුන් දෙදෙනා සමඟ සම්බන්ධ වී සැකකරු විසින් මෙම ජාවාරම සිදුකරගෙන ගොස් ඇති බවයි වාර්තා වුණේ.
සැකකරු විසින් එම මත්ද්‍රව්‍ය කඩුවෙල, කිරිඳිවැල, පූගොඩ හා හංවැල්ල යන ප්‍රදේශවලට ගෙන ගොස් බෙදාහැර ඇති අතර, මොහු වට්ස්ඇප් හරහා සම්බන්ධ වී මත්ද්‍රව්‍ය විවිධ ස්ථානවල තැබීම සිදුකරනු ලබන බවට අනාවරණය වී තිබෙනවා.
