කැකිරාව අධ්‍යාපන කලාපයට අයත් තිබ්බටුවැව ප්‍රදේශයේ පිහිටි ප්‍රසිද්ධ ජාතික පාසලක කලක් තිස්සේ සිදු වුණු සූක්ෂ්ම ඩෙස් – පුටු විකිණීමේ ජාවාරමක් වැටලීමට ගම්වාසීන් සමත් ව තිබෙනවා.
මෙම අපරාධය සිදු කිරීමට විද්‍යාලයේ මුරකරුවෙකු හා ඊට සහාය දුන් ගුරුවරයෙකු ද සිටින බවටයි හෙළි ව ඇත්තේ.
ඊයේ (02) රාත්‍රියේ දී ප්‍රධාන විදුලි ලාම්පු ද නිවා ගනිමින් විද්‍යාලය වෙත පැමිණ තිබූ අබිලි ද්‍රව්‍ය එක් රැස් කරන ආයතනයකට අයත් කුඩා ලොරි රථයකින් විද්‍යාලයේ ඩෙස් පුටු තොගයක් ප්‍රවාහනය කිරීමට සූදානම් වීමේ දී මග රැක සිටි ප්‍රදේශවාසීන් පිරිසක් විසින් රථය නවත්වා පරීක්ෂා කර තිබෙනවා.
එම පරීක්ෂා කිරීමේ දී හෙළි ව ඇත්තේ මෙම ලොරි රථය මගින් කලක සිට පාසලට අයත් ඩෙස් පුටු ජාවාරමක් සිදු කරන බවයි.
ඉන් අනතුරුව ප්‍රදේශවාසීන් විසින් ලොරි රථය සහ එහි රියදුරු ව කැකිරාව පොලිසියට භාර දී තිබෙනවා.
කෙසේවෙතත් ලොරි රථයේ රියදුරු පොලිසියට පවසා ඇත්තේ මෙම ඩෙස් පුටු අලුත්වැඩියා කිරීම සඳහා මෙලෙස රාත්‍රියේ දී පැමිණ රැගෙන යන බවයි.
මේ වනවිට මෙම සිද්ධියට සම්බන්ධ මුරකරු සහ ගුරුවරයා සිද්ධියෙන් පසුව ප්‍රදේශයෙන් පලා ගොස් ඇති බවට ද වාර්තා වනවා.
