ප්රමිතියෙන් තොර ප්රතිදේහ එන්නත් මිලදී ගැනීමේ සිද්ධිය සම්බන්ධයෙන් මාලිගාකන්ද මහේස්ත්රාත් අධිකරණ විසින් රක්ෂිත බන්ධනාගාර ගත කර සිටින හිටපු සෞඛ්ය අමාත්ය කෙහෙළිය රඹුක්වැල්ල මහතා ඇප මත මුදා හරින්නනේ ද? නැත්ද ? යන නියෝගය අගෝස්තු මස 01 වනදා ප්රකාශයට පත්කරන බව අභියාචනාධිකරණය අද (02) නියෝග කළා.
කෙහෙළිය රඹුක්වැල්ල මහතා විසින් ඉදිරිපත් කළ පෙත්සමක් දීර්ඝ ලෙස කරුණු සලකා බැලීමෙන් අනතුරුව අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ ශෂී මහේන්ද්රන් යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල විසින් මෙම නියෝගය ප්රකාශයට පත් කළා.
ඒ අනුව නඩුවට අදාළ ලිඛිත දේශන තිබේ නම්; ඒවා ජූලි මස 15 වැනිදාට පෙර ගොනු කිරීමට පියවර ගන්නා ලෙසත් විනිසුරු මඩුල්ල විසින් පාර්ශ්වකරුවන්ට දැනුම් දුන්නා.
මෙම පෙත්සම සලකා බැලීම සඳහා කැඳවනු ලැබූ අවස්ථාවේ දී ශ්රී ලංකා නීතිඥ සංගමය වෙනුවෙන් පෙනී සිටි ජනාධිපති නීතීඥ චන්දක ජයසුන්දර මහතා අධිකරණය හමුවේ කරුණු දක්වමින් මෙම නඩුකරයට පාදක වන ප්රශ්නගත ඖෂධ මිල දී ගැනීමේ ක්රියාවලියේ ආරම්භයේ සිට අවසානය දක්වා හිටපු සෞඛ්ය අමාත්යවරයාගේ සම්බන්ධයක් තිබෙන බව පෙන්වා දුන්නා.
හිටපු සෞඛ්ය අමාත්යවරයාගේ අනුදැනුමකින් තොරව මෙවැනි ඖෂධ මිල දී ගැනීමක් සිදු කිරීමට හැකියාවක් නොමැති බවත් ජනාධිපති නීතිඥවරයා වැඩිදුරටත් පෙන්වා දුන්නා.
කෙහෙළිය රඹුක්වැල්ල මහතා වෙනුවෙන් පෙනී සිටි ජනාධිපති නීතිඥ ෆයිස් මුස්තාෆා මහතා අධිකරණය හමුවේ කරුණු දක්වමින් මෙම සිද්ධියේ දී තම සේවාදායකයා නිර්දෝෂී පුද්ගලයෙකු බව සඳහන් කළා.
මෙම ඖෂධ මිල දී ගැනීමේ ක්රියාවලියට තම සේවාදායකයා සම්බන්ධ වූයේ සිය අමාත්යාංශයේ නිලධාරීන්ගෙන් ලැබුණු උපදෙස් මත බවත් ඊට ඔහුගේ පෞද්ගලික මැදිහත්වීමක් නොමැති බවත් ජනාධිපති නීතිඥවරයා වැඩිදුරටත් සඳහන් කර සිටියා.
ඉදිරිපත් වූ සියලු කරුණු සලකා බැලීමෙන් අනතුරුව අධිකරණය විසින් මෙම තීන්දුව ප්රකාශයට පත් කළා.
