එක්සත් ජනපද නියෝජිත මන්ත්‍රී මණ්ඩලය පකිස්ථානයේ 2024 මහමැතිවරණයට ඇඟිලි ගැසීම් ප්‍රකාශයන් පිළිබඳව “සම්පූර්ණ හා ස්වාධීන පරීක්ෂණයක්” ඉල්ලා යෝජනාවක් සම්මත කර ගෙන තිබෙනවා.
සම්මත කරන ලද යෝජනාව මගින් “ප්‍රජාතන්ත්‍රවාදය, මානව හිමිකම් සහ නීතියේ ආධිපත්‍යය තහවුරු කිරීම” සඳහා පාකිස්තානය සමඟ සහයෝගයෙන් කටයුතු කරන ලෙස එක්සත් ජනපද ජනාධිපති ජෝ බයිඩන්ගෙන් ඉල්ලා සිටියා.
යෝජනාව, ‘පකිස්ථානයේ ප්‍රජාතන්ත්‍රවාදය සහ මානව හිමිකම් සඳහා ප්‍රකාශ කිරීම’ යන මාතෘකාව යටතේ ජෝර්ජියාවේ කොංග්‍රස් සභික මැක්කෝමික් සහ මිචිගන්හි කොංග්‍රස් සභික කිල්ඩී විසින් ඉදිරිපත් කරන ලද අතර සභිකයන් 100කට අධික සංඛ්‍යාවක් විසින් සම අනුග්‍රහය දක්වා තිබෙනවා.
මේ වසරේ පෙබරවාරි 8 වන දින පැවති පකිස්ථානයේ මහ මැතිවරණයේ දී අක්‍රමිකතා රැසක් සම්බන්ධයෙන් චෝදනා එල්ල වූ අතර, අන්තර්ජාලය වසා දැමීම, වංචා කිරීම් සහ ප්‍රචණ්ඩත්වය රටේ විවිධ ප්‍රදේශවලින් වාර්තා වුණා.
මැතිවරණයේදී සිරගතව සිටින ඉම්රාන් ඛාන්ගේ නායකත්වයෙන් යුත් PTI සහාය ඇති ස්වාධීන කණ්ඩායම උපරිම ආසන සංඛ්‍යාව දිනා ගත්තා.
කෙසේ වෙතත්, නවාස් ෂරීෆ්ගේ පාකිස්තාන මුස්ලිම් ලීගය-නවාස් සහ බිලාවල් භූතෝ සර්දාරිගේ පාකිස්තාන මහජන පක්ෂය ෂෙහ්බාස් ෂරීෆ් අගමැති ලෙස පත් කරගනිමින් සභාග රජයක් පිහිටවූවා.
