මහව – අනුරාධපුර දුම්රිය ව්‍යාපෘතියේ ඉදි කිරීම් ප්‍රමාදයි

මහව – අනුරාධපුර දුම්රිය ව්‍යාපෘතියේ ඉදිකිරීම් එම කොන්ත්‍රාත් සමාගම එකඟ වූ පරිදි අදාළ දිනට නියමිත ව එම මාර්ගයේ වැඩ කටයුතු අවසන් කිරීමට නොහැකි වී තිබෙනවා.

මහව – ඕමන්ත දුම්රිය මාර්ග පුනරුත්ථාපන ව්‍යාපෘතිය ලෙස හඳුන්වන මෙහි සේවාදායකයා වන්නේ ශ්‍රී ලංකා දුම්රිය දෙපාර්තමේන්තුවයි.

2019 නොවැම්බර් මස 29 වැනි දින මෙම දුම්රිය මාර්ගයේ ඉදි කිරීම් කටයුතු ඇරඹුණු අතර සීමාසහිත ඉර්කෝන් ජාත්‍යන්තර සමාගම එහි කොන්ත්‍රාත්කරු වනවා.

ව්‍යාපෘතිය අවසන් කළ යුතු දිනය මෙම වසරේ ජුලි 06 වැනි දින වුව ද ප්‍රවාහන කටයුතු අමාත්‍ය ආචාර්‍ය බන්දුල ගුණවර්ධනගේ ඉල්ලීම පරිදි අදාළ කොන්ත්‍රාත් සමාගම මෙහි වැඩ කටයුතු ජුනි මස 15 වැනි දින අවසන් කර දුම්රිය දෙපාර්තමේන්තුව වෙත භාර දීමට එකඟ වුණා.

නමුත් මෙතෙක් එහි වැඩ කටයුතු අවසන් ව නැති බවයි වාර්තා වන්නේ.

මෙම දුම්රිය මාර්ගය ඉදි කිරීමෙන් අනතුරුව කිලෝමීටර් 128ක දුරක් ඉන් ආවරණය වනවා.

අදියර 04කින් ඉදිකිරීම් කෙරෙන මෙම ව්‍යාපෘතියේ 1 වැනි අදියර අනුරාධපුර සිට වව්නියාව දක්වා කිලෝමීටර් 48ක් ද, කිලෝමීටර් 13ක් වව්නියාවේ සිට ඕමන්තේ දක්වා ද අනුරාධපුර සිට මිහින්තලේ හන්දිය දක්වා කිලෝමීටර් 1.5ක් ද ඉදි කිරීමට නියමිතයි.

එහි දෙවැනි අදියර මහව සිට අනුරාධපුර දක්වා කිලෝමීටර් 65ක් දුරින් ඉදිවනු ඇති.

දෙවැනි අදියර ඉදිකර නිම වීමට මාස 06ක කාලයක් ගත වීම ගණනය කර තිබුණ ද එය මෙතෙක් අවසන් වී නැති බවයි වාර්තා වන්නේ.

මෙම දුම්රිය ව්‍යාපෘතිය අවසන් කිරීමට අමෙරිකානු ඩොලර් මිලියන 91.27ක මුදලක් වෙන් කර තිබෙනවා.

එය ශ්‍රී ලංකා මුදලින් රුපියල් මිලියන 30,000ක් වනු ඇති.

කෙසේවෙතත් මෙම සිදුවීම හේතුවෙන් මෙවර පොසොන් කලාපයට පැමිණෙන මගීන්ට රජයෙන් ලබාදීමට තීරණය කර සිටි ඇතැම් ප්‍රවාහන පහසුකම් ද මගහැරී යන බවයි වාර්තා වන්නේ.