පවතින අධික වැසි සහිත කාලගුණයත් සමඟ කැළණි, නිල්වලා, ගිං, කළු යන ගංඟා ආශ්රිතව ගංවතුර අනතුරු ඇඟවීමේ නිවේදන නිකුත් කර තිබෙනවා.
වාරිමාර්ග දෙපාර්තමේන්තුව විසින් අද (02) අලුයම නිකුත් කළ මෙම අනතුරු ඇඟවීමේ නිවේදනය ලබන 04 වනදා අලුයම 3.00 දක්වා වලංගු වනවා.
ඒ, අනුව ඉදිරි පැය 48 තුළ ගිං ගඟ ආශ්රිතව ඇති නෙළුව, තවලම, නාගොඩ, නියාගම, වැලිවිටිය-දිවිතුර, ඇල්පිටිය, අක්මීමන, බද්දේගම සහ බෝපේ-පොද්දල යන ප්රාදේශීය ලේකම් කොට්ඨාසවල ගිං ගඟ නිම්නයේ පහත්බිම් ආශ්රිතව ගංවතුර තත්ත්වයක් ඇතිවිය හැකි බවයි අනතුරු අඟවන්නේ.
එමෙන්ම නිල්වලා ගඟ ආශ්රිතව පස්ගොඩ, කොටපොල, පිටබැද්දර, අකුරැස්ස අතුරලිය, මාලිම්බඩ, කඹුරුපිටිය, තිහගොඩ, මාතර සහ දෙවුන්දර යන ප්රාදේශීය ලේකම් කොට්ඨාසවල පහත්බිම් ආශ්රිතව ද ගංවතුර තත්ත්වයක් ඇතිවිය හැකියි.
මේ අතර කළු ගඟ ආශ්රිතව රත්නපුර දිස්ත්රික්කයේ පැල්මඩුල්ල, කුරුවිට, රත්නපුර, නිවිතිගල, කුරුවිට, අයගම, ඇලපාත සහ කළුතර දිස්ත්රික්කයේ ඉංගිරිය, දොඩංගොඩ, හොරණ, මිල්ලනිය යන ප්රාදේශීය ලේකම් කොට්ඨාසවල පහත්බිම් ආශ්රිතව ද මෙම අනතුරු ඇඟවීම නිකුත්කර තිබෙනවා.
එමෙන්ම කැළණි ගඟ ආශ්රිතව ද ඉදිරි පැය 48 සඳහා දෙහිඕවිට, රුවන්වැල්ල, දොම්පේ, සීතාවක, හෝමාගම, කඩුවෙල, බියගම, කොළොන්නාව, කොළඹ සහ වත්තල යන ප්රාදේශීය ලේකම් කොට්ඨාසවල පහත්බිම් ආශ්රිතව ද ගංවතුර තත්ත්වයක් ඇතිවිය හැකි බවයි වාරිමාර්ග දෙපාර්තමේන්තුව අනතුරු අඟවා සිටින්නේ.
