දියතලාව ෆොක්ස් හිල් මෝටර් රථ ධාවන තරගය අතරතුර සිදු වූ අනතුර සම්බන්ධයෙන් පරීක්ෂණ පැවැත්වීම සඳහා කමිටුවක් පත් කිරීමට ශ්‍රී ලංකා යුද හමුදාව තීරණය කර තිබෙනවා.
මෙම කමිටුවට සාමාජිකයින් හත්දෙනෙක් ඇතුළත්.
මෙම කමිටුව විසින් අනතුරට හේතු පාදක වූ කරුණු මොනදවාද, වගකිවයතු අය කවුරුන්ද, තරගාවලිය නැරඹීමට පැමිණි ප්‍රේක්ෂකයන්ගෙන් ආරක්ෂාව තහවුරුකොට තිබුණේද, ධාවන පථයේ ප්‍රමිතිය සැබැඳිව වගකිවයුතු පාර්ශ්ව හා ආයතන නිසි පරිදි ක්‍රියා කර තිබුණේද, සහ ඉදිරියේ දී එවැනි අනතුරු සිදුවීම වළක්වා ගැනීමට ගතයුතු ක්‍රියාමාර්ග කවරේද, යන්න ඇතුළු කරුණු ගණානාවක් පිළිබඳව සොයා බැලීමට නියමිතයි.
පසුගිය ඉරිදා (21) පැවති ෆොක්ස් හිල් සුපර්ක්‍රොස් තරගාවලිය අතර තුර මෝටර් රථයක් අනතුරට ලක්වීමෙන් පුද්ගලයින් 07 දෙනෙකු ජීවිතක්ෂයට පත් වුණා.
මෙම අනතුරින් තවත් 19 දෙනෙකු තුවාල ලැබූ අතර, ඔවුන් බදුල්ල සහ දියතලාව යන රෝහල්වල ප්‍රතිකාර ලබනවා.
අනතුර සම්බන්ධයෙන් මෝටර් රථ ධාවකයින් දෙදෙනා ඊයේ (22)පොලිස් අත්අඩංගුවට ගනු ලැබුවේ දියතලාව මූලික රෝහලේ ප්‍රතිකාර ලබමින් සිටියදීයි.
සැකකරුවන් පරික්ෂා කිරීමට බණ්ඩාරවෙල මහේස්ත්‍රාත්වරයා ඊයේ (22) පෙරවරුවේ දියතලාව මූලික රෝහලට පැමිණි අතර, අත්අඩංගුවට ගත් දෙදෙනා ලබන 30 වනදා දක්වා රක්ෂිත බන්ධනාගාර ගත කරන ලෙස එහිදී නියෝග කෙරුණා.
